ආතරයිටීස් - (01)

ආතරයිටීස් රෝගය හැදින්වීම සහ ඒ පිළිබඳව ආයුර්වේද වෛද්‍ය විද්‍යාත්මක පිළියම්........... (01)

❆❆❆❆❆❆❆❆❆❆❆❆❆❆

අපි නගාසිටින්නේ,අපි දරාසිටින්නේ අපගේ අස්ථි සැකිල්ල මතය.අස්ථි සැකිල්ලට වනු ලබන හානි සහ රෝගී තත්වයන් මත අපගේ එදිනෙදා ජීවිතයේ කාර්‍යක්ෂම බව හා සාර්ථක බව නිතැතින්ම තීරණය වේ .ඔබට කොන්දේ කැක්කුමක් සෑදුනු දිනයක් ගැන මදක් සිතා බලන්න ,එදින ඔබගේ කාර්‍යක්ෂමතාවය කෙසේවීද................

ආතරයිටීස් රෝගය යනු ඔබට එලෙස වැලදුනු කොන්දේ කැක්කුම මෙන් සුළුපටු අවස්ථාවක් නොවේ.එය සමස්ත අස්ථි සැකිල්ල මතටම බලපෑම් ඇතිකරයි.ආතරයිටීස් රෝගයේ අවසාන ඵලය වන්නේ සමස්ත අස්ථි සැකිල්ලම විකෘති වීමයි.එය කෙසේදයත්, දොරක අගුලක් විවෘත කිරීමට නොහැකි තත්වයට ඔබේ අස්ථි සැකිල්ල දුර්වල වේ.

මෙම රූපයේ දක්වා ඇත්තේ ඔස්ටියෝආතරයිටීස් රෝගය නිසා අතක ඇගිලි පුරුක් වල සිදුවූ විකෘතියකි.

බටහිර වෛද්‍ය විද්‍යාත්මකව මෙම රෝගය නිට්ටාවටම සුවකිරීම සදහා ප්‍රථිකාර නොපවතින අතර රෝග කළමණාකරනය සදහා පමණක් ප්‍රථිකාර පවතී .එය වේදනා නාශක වලින් ආරම්භ වන අතර ඖෂධ එන්නත් කිරීම් ඔස්සේ අදාල රෝගී සන්ධියේ ශල්‍යකර්මයන් සිදුකිරීම දක්වා පැතිරුනු රෝග කලමණාකරනයක් සිදුකරයි.

වේදනා නාශක මගින් වකුගඩු වලට හානිකර බලපෑම් ඇතිකර්‍යි.එම හේතුව නිසා ආතරයිටීස් සදහා ප්‍රථිකාර කරන බටහිර වෛද්‍යවරුන් රෝගීන්ගේ වකුගඩු සම්බන්ධයෙන් නිසි අවධානයෙන් පසුවෙයි.එමෙන්ම ,භෞත චිකිත්සක ප්‍රථිකාර මෙම රෝගී තත්වය සදහා සුදුසු වන අතර ,එමගින් සන්ධි ආශ්‍රිත මාංශ පේශි හා සන්ධියේ චලනයන් පහසු කිරීමට දායක වේ.

ලොව පුරා ආතරයිටීස් රෝග ආකාරය විශාල සංඛ්‍යාවක් පවතී.මේවා අතුරින් ශ්‍රී ලංකාව තුළ වඩාත් පුළුල් ලෙසට ව්‍යාප්ත වූ ආතරයිටීස් ප්‍රභේද දෙකක් පවතී .

1. රුමැටොයිඩ් ආතරයිටීස්

2. ඔස්ටියෝආතරයිටීස්

සාමාන්‍යයෙන් සිංහලෙන් බොහෝ දෙනා "හන්දිපත් රුදාව" කියලා හදුන්වන්නේ මෙම ආතරයිටීස් රෝගී තත්වයයි.ආතරයිටීස් යනු ලතින් භාෂාවේ වචනයක් වන අතර එහි අර්ථය වන්නේ " සන්ධි ප්‍රදාහය " යන්නයි.මෙම ආතරයිටීස් රෝගය සෑදීම සදහා නිශ්චිත වයසක් නොමැති අතර නමුත් තරමක් අවධානම් වයස් කාණ්ඩ පවතී .

ආයුර්වේද වෛද්‍ය විද්‍යාවේදී ,ආතරයිටීස් රෝගය "ආමවාතය" ලෙසට හදුන්වයි .තුන්දොස් වලින් පිත සහ වාතය කිපීම මගින් මෙවැනි රෝගී තත්වයක් ඇතිවේ.

"ආමය" යනු රස ධාතුවේ ඇති විදග්ධ ස්වාභාවයයි.එනම්,ආමාශයේ ඇති රස ධාතුවේ බර ගතියයි,නොපැසවූ ස්වාභාවයයි .

එනම් ආහාරයේ ඇඹුල් ගැසී ආමාශය තුළ නරක් වූ ස්වාභාවයයි .මෙම ආමය රක්ත ධාතුව සමග මිශ්‍රව ශරීරය පුරා වාතය ඔස්සේ සංසරණය වේ .මෙම ආමය මුසු වූ විෂ ස්වාභාවය ශරීරයේ සමහර සන්ධි වල එක්‍ රැස් වීමක් සිදුවේ.එමගින්,එම සන්ධි පීඩාවට හා ප්‍රදාහයට ලක් කරයි.

මෙම ආහාර මගින් ආමාශයේ සෑදෙන විෂ සහිත " ආමය " ගැස්ට්‍රයිටිස් රෝගය සදහාත් මූලික හේතුව වේ.එමනිසා,ගැස්ට්‍රයිටිස් රෝගය සෑදී ඇති සමහර පුද්ගලයින් සදහා දෙවනුව මෙම ආතරයිටීස් / ආමවාත රෝගය සෑදීමේ අවදානමක් පවතී.

සන්ධියක් යනු,අස්ථි දෙකක් එකිනෙක සම්බන්ධ වන ස්ථානයක් වේ.මෙම සන්ධියක් ආශ්‍රිතව පේශි,කණ්ඩරා,කාටිලේජ ආදිය පවතී.අස්ථි දෙකක් අතර කාටිලේජ පටකයක් පැවතීම නිසා අප සිදුකරන එදිනෙදා ක්‍රියාකාරකම් වලදී අස්ථි මගින් එකිනෙක ඇතිවන ගැටීම් වලක්වා,අස්ථි මත ඇතිවන කම්පනය මැඩලීමට ක්‍රියාකරයි.මෙම අස්ථි අතර කාටිලේජ පටකය නොතිබිණි නම් අස්ථි එකිනෙක ඝට්ටනයට ලක්වීම සිදුවේ

මෙම රූප සටහනේ පවතින්නේ නීරෝගී දණහිස් සන්ධියක් වේ.ඉහල සහ පහළ අස්ථි දෙක අතර පවතින කාටිලේජ පටකය මෙමගින් නිරූපණය වේ.

ආතරයිටීස් රෝගය සදහා ප්‍රධාන වශයෙන් බලපාන්නේ මෙම අස්ථි දෙකක් අතර පවතින කාටිලේජ වල විවිධ අසාමාන්‍යතාවයන් වේ.

ලිපියේ දීර්ඝ බව වැලැක්වීම සදහා මෙම ලිපියේ දී රුමැටොයිඩ් ආතරයිටීස් රෝගය පිළිබඳව පමණක් අවධානය යොමුකරමු.

ආතරයිටීස් (02) ලිපියෙන් ඔස්ටියෝආතරයිටීස් රෝගය පිළිබඳව තොරතුරු පසුව සාකච්ඡා වේ.

රුමැටොයිඩ් ආතරයිටීස් රෝගය සෑදෙන්නේ දේහයේ ප්‍රතිශක්තීකරණය සම්බන්ධ ක්‍රියාවලියක් නිසාය.මෙහිදී අස්ථි පද්ධතියේ සන්ධි තුළ පවතින කාටිලේජ වල අසාමාන්‍යතාවයක් නිසා දේහ ප්‍රතිශක්තීකරණයට අදාල ප්‍රතිදේහ මගින් කාටිලේජ පටකය විනාශ කරයි.

සාමාන්‍යයෙන් වයස අවුරුදු 16 ට වඩා අඩු ළමුන් අතර මෙම රෝගය බහුල වන අතර වැඩිහිටි පුද්ගලයින්ද මෙම රෝගයට භාජනය වේ.

රුමැටොයිඩ් ආතරයිටීස් රෝගී තත්වය දණහිස් සන්ධිය,වැලමිට සන්ධිය,මැණික් කටු සන්ධිය වැනි සන්ධි වලින් ආරමභ වී උකුල් සන්ධිය , උර සන්ධිය ,ඇගිලි පුරුක් හා කශේරුකා දක්වාම ව්‍යාප්ත වේ.මෙහිදී විශේෂයෙන් සෙම්ගෙඩි ප්‍රධාහය සහ උණ ඇතිවීමක් සිදුවේ.මෙය සාමාන්‍යයෙන් "රුමැටික් උණ" ලෙසට හදුන්වයි .

රුමැටොයිඩ් ආතරයිටීස් රෝගය සදහා බලපාන ප්‍රධාන හේතුව වන්නේ ශරීරයේ පෝෂණ ඌණතාවයන් වේ.

අස්ථි අතර පවතින කාටිලේජ පටක වලට අවශ්‍ය පෝෂණයන් නොලැබෙන විට අදාල පටක මියයාම සිදුවේ.එහිදී අළුතින් කාටිලේජ පටක සෑදීමක් සිදුකරනු ලබන්නේ,අක්මාව මගිනි.අක්මාවට ඒ සදහා අවශ්‍ය පෝෂක නොලැබී යාම නිසා,අක්මාව මගින් අළුතින් පටක සෑදීමක්ද සිදුනොවේ. එමනිසා, මෙම මිය ගිය පටක ප්‍රතිදේහ මගින් භක්ෂණය කරයි.එහිදී සන්ධිය තුළ දී විවිධ රසායනික ප්‍රතික්‍රියා රාශියක් සිදුවේ.

මෙම ක්‍රියාවලිය නිසා අස්ථි අතර පවතින කාටිලේජ පටකය අළුතින් නොසෑදීම සහ පවතින පටකය මිය යාම නිසා කම්පන අවස්ථා වලදී අස්ථි එකිනෙක ගැටීම නිසා සන්ධි චලනය කල නොහැකි තත්වයට පත්වේ.එම හේතුව නිසා මෙම රුමැටොයිඩ් ආතරයිටීස් රෝගය පහසුවෙන් හදුනාගැනීම සදහා ඊටම ලාක්ෂණික රෝග ලක්ෂණ පවතී .

• එම රෝගී තත්වය පවතින සන්ධිය චලිනය කිරීමේදී අධික වේදනාවක් හටගැනීම.

සන්ධියේ අස්ථි අතර පවතින කාටිලේජ පටකය නොමැති වීම නිසා සන්ධිය චලනයේදී අස්ථි එකිනෙක ගැටීමක් වේ.එමනිසා,මෙම තත්වය හටගනී.

• සන්ධිය අනවශ්‍ය ලෙසට ඉදිමීමකට ලක්වීම.

සන්ධිය අසල ප්‍රතිදේහ මගින් සිදුකරන ක්‍රියාවලීන් නිසා සන්ධියෙන් ඝ්‍රාවය වන අධික තරලය නිසා ඉදිමුම් ස්වරූපයක් ගනී.

• සන්ධිය අසල රතු වීමක් සහ එහි උෂ්ණත්වය ඉහල යාමක් පැවතීම.

• සන්ධිය අසල බර ගතියක් පැවතීම.

• ඇගපත වේදනාව සහ විඩාව.

• දේහ උෂ්ණත්වය ඉහල ගොස් උණ ඇතිවීම.

මෙය රුමැටික් උණ ලෙසට හදුන්වයි.

• ආහාර අරුචිය .

• උගුරේ සහ ඇස් වල වේදනාව හා ඒවායේ වියළි ගතියක් ඇතිවීම.

රුමැටොයිඩ් ආතරයිටීස් රෝගය හට ගැනීම සහ එය වැලදී පවතින කාලය පුද්ගලයා මත වෙනස් විය හැකිය.සමහර අයෙකුට මෙම රෝගය සෑදී සුව වී නැවතත් පසු කලකින් සෑදිය හැකිය .එම කාල පරතරය සතියක් , මාසයක්, වසරක් හෝ වසර කීපයක් වුවත් විය හැකිය.

රුමැටොයිඩ් ආතරයිටීස් රෝගය දීර්ඝකාලීනව පැවතීම හෝ නිශ්චිත වෛද්‍ය උපදෙස් පිලිනොපැදීම නිසා විවිධ අතුරුප්‍රතිඵල වලට බදුන් විය හැකිය.

1. හෘදයේ කපාට ආශ්‍රිත විවිධ සංකූලතාවයන් ඇතිවීම.

2. මුලින් සාමාන්‍යයෙන් විශාල සන්ධියකින් මෙම රෝගය ආරම්භ වී පසුව සමස්ත ශරීරයේ සෑම සන්ධියක් ආශ්‍රිතවම රෝගය ව්‍යාප්ත වීම.

3. දීර්ඝකාලීන රෝගී තත්ව හමුවේ සන්ධි ව්කෘති වීම.

4. සන්ධි චලනය කරන විටදී එය වේදනාකාරී වීම නිසා සන්ධි චලනය සිදු නොකරන විටදි සන්ධි ආශ්‍රිත මාංශ පේශි , කණ්ඩරා හා බන්ධනී වල ක්‍රියාකාරීත්වය දුර්වල වී තවදුරටත් සන්ධි ආශ්‍රිත තද බව වැඩි වීම හා ඉදිමුම වැඩි වීම.

5. අක්ෂි ගෝලයේ ආසාත්මිකතාවයන් ඇතිකල හැකිය .

රුමැටොයිඩ් ආතරයිටීස් රෝගය සෑදීම සදහා ප්‍රධාන හේතුව වන්නේ,ශරීරයේ ඇති වන පෝෂණ ඌණතාවයන් වේ.ඊට අමතරව තවත් ශේෂ හේතූන් පවතී.

• ක්ෂණික හා රසකාරක අධිකව යෙදූ ආහාර භාවිතය.

මෙමගින් රෝග නිධානය වන "ආමය" ඇතිවීම තවදුරටත් වැඩි වීම සිදුවේ.

• නිසියාකාර ව්‍යායාම් වලින් තොර අලස ජීවිතයක් ගතකිරීම .

• වැරදි ඉරියව් සදහා පුරුදු වීම.

• ආහාර අරුචිය නිසා නිසි පෝෂණයක් නොමැති වීම.

• අධික වශයෙන් තෙල් වලින් බදින ලද මස් වර්ග සහ වෙනත් ආහාර වර්ග අනුභවය .

• යීස්ට් යොදා දීර්ඝ වේලාවක් පිපෙන්නට තිබූ ආහාර අනුභවය .

• ශීත දේශගුණික තත්වයන්.

මෙම රෝගය ශීත දේශගුණ අවස්ථා වලදී උත්සන්න වේ.සමහර රෝගීන් සදහා වර්ෂා කාලයේදී රෝගය උත්සන්න වන අතර වර්ෂාව අඩු වීමත් සමග රෝගී තත්වයේ අඩු වීමක් ඇතිවේ.

මෙම රෝගය සදහා නිසි වයස් පරතරයක් නොමැති නිසා ඔබට ඉහත දැක්වූ ආකාරයට රෝග ලක්ෂණ පවතීනම් ඉක්මනින් වෛද්‍ය ප්‍රථිකාර ලබාගැනීම සුදුසු වේ.ආයුර්වේද වෛද්‍ය විද්‍යාව තුලදී රෝගය නිට්ටාවටම සුව කිරීම සදහා ඖෂධ පවතී.

එහිදී රෝගියාගේ අභ්‍යන්තරව මෙන්ම බාහිරවද ප්‍රතිකාර කරනු ලැබේ.අභ්‍යන්තරව ක්ෂාය සහ වෙනත් ඖෂධ වර්ගද බාහිර ප්‍රථිකාර ලෙසට තෙල්,තැවිලි,පත්තු ලේප හා මැල්ලුම් ද රෝගී නිරීක්ෂණයෙන් පසුව අවස්ථානෝචිතව වෛද්‍යවරයා නිර්දේශ කරයි.

මීට අමතරව ,

• මෙම රෝගී තත්වය සදහා ඇල් දිය භාවිතය සම්පූර්ණයෙන්ම නුසුදුසු වේ.

• කාලගුණය පිළිබඳව රෝගියා මනා සැලකිලිමත් බවක් දැක්විය යුතුය .

සාමාන්‍යයෙන් වර්ෂා කාලයේදි රෝගී තත්වය උත්සන්න වන අතර වර්ෂාව අවසන් වීම සමග රෝගී තත්වය තරමක් සුවවේ.එහිදී ,රෝගියා ප්‍රතිකාර ලබාගැනීම වෛද්‍ය නිර්දේශයෙන් තොරව අවසන් නොකල යුතුය .

• සුදුසු ආහාර ලෙසට සුදුළූණු , කොල්ලු, සාරණ, නිවිති , බීට් රූට්, වැටකොළු , කරපිංචා , පළා වර්ග , වට්ටක්කා, මුං ඇට, හීනටි හාල් සහ ඇල් සහල් ගුණාත්මක වේ.

• කෝපි සහ තේ අනවශ්‍ය ලෙසට පානය නොකල යුතුය .

• මත්පැන් හා දුම් පානයෙන් සම්පූර්ණයෙන්ම ඉවත් විය යුතුය .

• අධික මානසක ආතතියෙන් මිදීම කල යුතුය .

• රාත්‍රියට නිදි වැරීම සහ දහවලදී අනවශ්‍ය ලෙසට නිදාගැනීම අහිතකර වේ.

• අධික වෙහෙසකර රැකියාවන් හෝ කාර්‍යන් නොකල යුතු අතර දිනකට වෛද්‍යවරයා විසින් නිර්දේශ කරන ව්‍යායාම අනිවාර්යයෙන්ම සිදුකල යුතුය .

සන්ධි හා ඒ ආශ්‍රිතව ඇති අස්ථීන් විකෘති විම වැලැක්වීම ව්‍යායාම මගින් සිදුවේ.

• ශරීරයේ බර හැකිතාක් අඩුකරගන්න .

මෙය රෝගය සුවවීම සදහා අවශ්‍ය ප්‍රථිකාර ක්‍රමයක් නොවූවත් මින් සිදුකරන්නේ සන්ධි මත ඇතිවන පීඩනය අඩු කර ගනිමින් සන්ධි චලනයේදී රෝගියාට ඇතිවන වේදනාව අඩු කිරීමයි.

• තිරිඟු ,තක්කාලි ,මිරිස්, වම්බටු, අල වැනි එලවළු වර්ග ද,ගැඹුරු තෙලේ බදින ලද ආහාර වර්ගද, ක්ෂණික බීම වර්ගද පානයෙන් වලකින්න.

ඔස්ටියෝආතරයිටීස් රෝගය හා එයට අදාල ආයුර්වේද වෛද්‍ය විද්‍යාත්මක පැහැදිලි කිරීම සමග ආතරයිටීස් (02) ලිපියෙන් නැවත හමුවෙමු.................

D.H.S.L

ලිපියේ ගුණාත්මකභාවය පිළිබඳව ඔබගේ මතය ලිපියට පහළින් ඇති " ලිපියට ලබා දෙන ලකුණු " තීරුවේ මනාපයක් ( ✔) ලෙසට පළකරන්න .


Facebook සමාජ ජාල මාධ්‍ය ඔස්සේ "දිනපොත" පිටුව සමග මෙතනින් ( ✱✱✱✱✱✱  )එකතු වී නවතම ලිපි පරිශීලනය කරන්න .

✿✿✿✿✿✿✿✿✿✿✿✿✿

සුද යාම / ශ්වේත ප්‍රදරය

සුද යාම හෙවත් ශ්වේත ප්‍රදරය පිළිබඳව ආයුර්වේද වෛද්‍ය විද්‍යාත්මක මතය

❁❁❁❁❁❁❁❁❁❁❁❁❁❁❁❁❁

වර්තමාන කාර්‍යබහුල සමාජය තුළ පිම්මේ දිවීමට ඕනෑම කෙනෙක් හට සිදුවේ .එය සදහා ලිංග භේදයක් නොමැත.සමහර රෝග මගින් එදිනෙදා ජීවිතයේ ක්‍රියාකාරකම් සදහා බාධාවන් ඇතිවේ.වෛද්‍ය විද්‍යාවේ සැබෑ අර්ථය වන්නේ ,මෙම බාධාවන් වලින් රෝගීන් මුදාගෙන ඔවුන්ගේ සාමාන්‍ය ජීවිතය වඩා සැපවත් කිරීමයි.

ලිංගික වශයෙන් පරිණත වූ (එනම් ද්වීතියික ලිංගික ලක්ෂණ ඇති වූ දා පටන්) කාන්තාවන් බොහෝ දෙනෙකු මුහුණ දෙන කාන්තා රෝගයක් ලෙසට " ශ්වේත ප්‍රදරය / සුද යාම" හැදින්විය හැකිය .සමහර කෙනෙකු මෙය රෝගයක් ලෙසට නොසලකා සාමාන්‍ය තත්වයක් ලෙසට හැදින්වූවත් ,මෙම රෝගය සමහර අවස්ථා වලදී තවත් රෝග රාශියකට මූලාරම්භය විය හැකිය.

ලිපිය පරිශීලනය කරන අයගේ තේරුම් ගැනීමේ පහසුව තකා සුද යාම සදහා බටහිර වෛද්‍ය විද්‍යාවේදී හේතු වශයෙන් දක්වන කරුණු ද මෙහි අන්තර්ගත කර ඇත.

බටහිර වෛද්‍ය ක්‍රමයට අනුව මෙම රෝගයට ප්‍රථිකාර කළ විටදී බොහෝ රෝගීන්ට ඖෂධ ලබාගන්නා තෙක් රෝගය සුව වුවත් ඖෂධ ලබාගැනීම නතර කල පසු එය නැවතත් ඉස්මතු විමක් සිදුවේ.නමුත් ආයුර්වේද වෛද්‍ය විද්‍යාවට අනුව මෙය නිට්ටාවටම සුවකල හැකි රෝගී තත්වයක් වේ.

ආයුර්වේද වෛද්‍ය විද්‍යාවට අනුව ශේවේත ප්‍රදර රෝගය "කාන්තා රෝග" සමග සමපාත කිරීමට හැකිය.මෙය මූලික වශයෙන් ස්ත්‍රී ලිංගික පද්ධතිය ආශ්‍රිත රෝගී තත්වයක් වේ.සෙම සහ පිත යන ද්වීදෝෂ කෝපවීම නිසා මෙම තත්වය ඇතිවේ.

ඩිම්බ මෝචනය වීම,ගැබ් ගැනීම,ඔපස් චක්‍රය සිදුවීම වැනි කරුණු නිසා සාමාන්‍යයෙන් යෝනි මාර්ගය ආශ්‍රිතව තෙත් වී සුළු ඝ්‍රාවයක් පැවතීම සාමාන්‍ය වේ.එමගින් ස්ත්‍රී ලිංගික පද්ධතිය සදහා අයහපතක් සිදු නොකරයි .නමුත් සුද යාම තත්වයේදී මෙම තත්වයට වඩා සැබවින්ම වෙනස් වූ තත්වයක් ඇති කරයි.

ආයුර්වේද වෛද්‍ය විද්‍යාවට අනුව යෝනි මාර්ගය තුලින් පිටවන ඝ්‍රාවයේ වර්ණය අනුව ප්‍රදර රෝග අවස්ථා දෙකක් පවතී.

1. ශ්වේත ප්‍රදරය

2. රක්ත ප්‍රදරය

සාමාන්‍ය මුල් අවස්ථාවේදී ශ්වේත ප්‍රදර රෝගී ලක්ෂණ පිළිබඳව සලකා බලමු .

• යෝනි මාර්ගය තුලින් අධික වශයෙන් තරමක් උකු ස්වාභාවයෙන් යුතු ඝ්‍රාවයක් අධික වශයෙන් පිටවීම.මෙය සුදු පැහැය ,කහ පැහැය,රතට හුරු කහ පැහැය ලෙසට විවිධ පැහැයන්ගෙන් යුක්ත විය හැකිය.

සමහර කාන්තාවන්ගේ මෙය සුදු පැහැති කුඩා කැබලි / පොල් කුඩු වශයෙන් යෝනි මාර්ගය තුළින් ඉවත් වී ඒ ආශ්‍රිතව ඇසිරී පැවතිය හැකිය.

සාමාන්‍යයෙන් ස්ත්‍රී යෝනි මාර්ගය අසල ඒ ආශ්‍රිත ඝ්‍රාවි ග්‍රන්ථි මගින් නිපදවන ඝ්‍රාවයන් මගින් තරමක තෙත් බවක් ඇතිවීම සිදුවේ .නමුත් එහිදී අධික ඝ්‍රාවයක් දිගු කාලීනව වැගිරීමක් සිදු නොවේ.

• එම වැගිරෙන ඝ්‍රාවය ගන්ධයකින් යුක්ත වේ.

සාමාන්‍යයෙන් යෝනි මාර්ගයෙන් නීරෝගී කාන්තාවකගෙන් නිකුත් වන ඝ්‍රාවය මෙලෙස ගන්ධයක් ඇති නොකරයි.

• මෙම ඝ්‍රාවය වැගිරෙන අවස්ථාවන් වලදී යෝනි මාර්ගය ආශ්‍රිතව කැසීමක් , ඉකිලි ආශ්‍රිතව කැසීමක් ඇතිවිය හැකිය.ඒ ආශ්‍රිතව පලු දැමිමක් සිදුවීම.

• මුත්‍රා කිරීමේ අපහසුතාවය හා මුත්‍රා දැව්ල්ල.

• හිසරදය,ඇගපත රිදීම,කොන්දේ පහළ කොටසේ වේදනාව.

• අධික නිදිමත ස්වාභාවය .

• ලිංගේන්ද්‍රය ආශ්‍රිතව රතුවීම හෝ ඉදිමීම.

• යෝනිය ආශ්‍රිතව තුවාල ඇතිවීම.

• ශරීරයේ බර අඩු වීම.

• ආහාර අරුචිය හා මලබද්ධය ඇතිවීම.

• ශරීරයේ දැවිල්ලක් ඇතිවීම.

මෙම රෝගී ලක්ෂණ වලින් සමහර රෝගී ලක්ෂණ වෙනත් රෝග සදහාද පෙන්නුම් කරනු ලබන රෝගී ලක්ෂණ නිසා ඔබ සුද යාම ලෙසින් හදුනාගන්නා රෝගය වෙනත් රෝගයක් විය හැකිය.එමනිසා ,අනිවාර්‍යයෙන්ම ආයුර්වේද වෛද්‍ය හෝ බටහිර වෛද්‍ය ප්‍රතිකාර ලබාගන්න.

සුද යාම රෝගය සදහා බටහිර වෛද්‍ය විද්‍යාවේදී හේතු ලෙසට ප්‍රධාන වශයෙන් සදහන් කරන්නේ දිලීර ආසාදනයන් වේ.

යෝනි මාර්ගය තුල එය තුලට ඇතුළු වන ව්‍යාධිජනකයින් මගින් ආරක්ෂා වීමට සහ එහි තෙත් භාවය ඇතිකිරීම විවිධ ක්ෂුද්‍රජීවීන් වාසය කරයි.Lactobacillus ,Yeast මෙවැනි ක්ෂුද්‍රජීවීන් සදහා උදාහරණ ලෙසට දැක්විය හැකිය .

සාමාන්‍ය නීරෝගී ලිංගේන්ද්‍රයක් තුළ මෙම ක්ෂුද්‍රජීවීන්ගේ නිසි සමතුලිතතාවයක් පවතී.නමුත් ,එක් ක්ෂුද්‍රජීවී විශේෂයක් බහුල වශයෙන් වර්ධනය වීම නිසා මෙම ක්ෂුද්‍රජීවී ව්‍යාප්තියේ සමබරතාවය ගිලිහී දිලීර ආසාදන තත්වයක් යෝනිමාර්ගය ආශ්‍රිතව ඇතිවේ.මෙම තත්වයේ ප්‍රථිඵලයක් ලෙසට සුද යාම සිදුවේ.

ආයුර්වේද වෛද්‍ය විද්‍යාවට අනුව මෙම රෝගය සදහා පැතිරුනු පරාසයක් තුළ රෝගය සෑදීමේ හේතු ඇත.එහිදී අදාල රෝග ලක්ෂණය නොව රෝග නිධානය හදුනාගෙන එයට ප්‍රථිකාර කිරීම මගින් රෝගය නිට්ටාවටම සුවකළ හැකිය.

එම හේතු පිළිබඳව සලකමු .

• ශරීරයේ පිත කෝපවීම මගින් මෙම රෝගී තත්වය ඇතිවේ,එයට ප්‍රධාන හේතුව වන්නේ ,උෂ්ණ අධික ආහාර වර්ග අනුභවයයි.

උෂ්ණ අධික ආහාර වර්ග ලෙසට අන්නාසි,අමු අඹ,ඇඹරැල්ලා ,බිලිං ,තක්කාලි ,බලකරවල, අච්චාරු මෙන්ම වර්තමානයේදී භාවිතා කරන සියළුම ක්ෂණික ආහාර වර්ග හා කෘතීම රසකාරක(මොනො සෝඩියම් ග්ලූටොමේට් ආදිය) යෙදූ ආහාර වර්ග හැදින්විය හැකිය.

• සනීපාරක්ෂක පුරුදු පිළිබඳව අඩුඅවධානය

කාන්තාවන් සාමාන්‍යයෙන් ඔපස් වීමට බදුන් වීම හා යෝනිමාර්ගය ආශ්‍රිතව විවිධ ඝ්‍රාවීයන් ඇතිවන නිසා සනීපාරක්ෂාව සදහා ප්‍රමුඛත්වය ලබාදිය යුතුය .

• එක් වේලකදී පමණ ඉක්මවා ආහාර අනුභවය හා දිරවීමට පෙර නැවතත් ආහාර අනුභවය .

• අධික ලෙසට කුසගින්නේ සිටීම.

සමහර කාන්තා පාර්ශවය කෙට්ටු වීම සදහා ඩයට් කිරීමට ගොස් මෙම රෝගී තත්වයට බදුන් වේ.

ඉහත කාරණය සහ මෙම කාරණය මගින් දේහයේ පිත ධාතුව ආවේග වීමක් වේ.එමගින් සුද යාමේ තත්වය ඇතිවේ.

• අක්‍රමවත් ඔපස් චක්‍රය.

• දීර්ඝකාලීනව පවතින දියවැඩියාව , හතිය, පාණ්ඩුව, කැස්ස සහ සමේ රෝග තත්වයන්.

• දීර්ඝකාලීන මානසික ආතතිය .( බිය හා කෝපය වැනි තත්වයන් අදාල වේ.)

• මලබද්ධය .

• රැකියා ස්වාභාවය අනුව .

දීර්ඝකාලීන වාඩිවී හෝ සිටගෙන සිටින රැකියා වල නිරත විම හා නිතර බරවැඩ වල නිරත වීම.

• පොදු වැසිකිලි නිතරම භාවිතා කිරීම.

• ඇතැම් පනු රෝග තත්වයන්.

මෙහිදී සනීපාරක්ෂක පුරුදු වල අඩුපාඩුකම් නිසා යෝනිය තුළින් පනු බිත්තර යෝනි මාර්ගය තුලට ඇතුළු වී එය ගර්භාෂය ආශ්‍රිතව පනුවන් සෑදී ඔවුන්ගේ ක්‍රියාකාරීත්වය නිසා ගර්භාෂයික බිත්තියේ කොටස්මෙලෙස සුද වශයෙන් ‍යෝනිය තුළින් ඉවත් විය හැකිය .

• අක්‍රමවත් උපත්පාලන ක්‍රම.

සමහර කාන්තාවන් සදහා සමහර උපත්පාලන ක්‍රම විවිධ ආසාත්මිකතාවයන් පෙන්නුම් කරයි.විශේෂයෙන්ම හෝමෝනමය උපත්පාලන ක්‍රම මගින් සුද යාම සදහා වැඩිපුර බලපෑම් ඇතිකරයි.( ගිලින පෙති ,එන්නත් හා රදවන )

එමනිසා හෝමෝනමය නොවන කොන්ඩම් භාවිතය , ලූපය තැන්පත් කිරීම වැනි උපත්පාලන ක්‍රම වලට යොමුවීම වැදගත් වේ.

මෙම සුද යාමේ රෝගය සදහා රෝගි ලක්ෂණ ඉහතින් කියූ ආකාරයට පෙන්නුම් කරත්,වෙනත් රෝගී තත්වයන් සදහාද මෙම රෝගී ලක්ෂණම පෙන්නුම් කල හැකිය.

එමනිසා ,පලමුවෙන්ම කල යුත්තේ වෛද්‍යවරෙක් වෙතට යොමුවීමයි.එහිදී රෝග ඉතිහාසය මගින් රෝග නිදානයට ආයුර්වේද වෛද්‍යවරයා ප්‍රථිකර්ම කරනු ඇත.

පහතින් දක්වන්නේ එවැනි වෙනත් රෝගී තත්වයන් පිළිබඳව වේ. 

• ලිංගික සම්පේක්ෂණ රෝග

කිසියම් කාන්තාවක් එක් සහකරුවෙකු නොව බහු පුරුෂ සේවනයේ යෙදේ නම් ඇය මෙම රෝගී තත්වය පිළිබඳව අවධානය යොමු කල යුතුය .ගොනෝරියාව,හර්පීස් වැනි සමාජ රෝග වලදී මෙම වර්ණ වලින් නොවූවත් මීට ආසන්න වශයෙන් සුද යාමක් සිදුවේ.

• ගබ්සා වීමකදී.

• පිලිකා තත්වයන් හිදී.

ගැබ් ගෙල පිලිකා , ගර්භාෂය ආශ්‍රිත වෙනත් පිලිකා සහ විවිධ අසාමාන්‍යතා වලදී මෙවැනි තත්වයක් ඇතිවේ .

• ඩිම්බ කෝෂ ආශ්‍රිත අසාමාන්‍ය තත්ව වලදී.

මෙවැනි අවස්ථා පූර්වයෙන් හදුනා ගෙන අනාගතයේදී දරුඵල නොමැති වීම වැනි ගැටළු වලින් මිදිය හැක.

කාන්තාවන් සදහා සාමාන්‍යයෙන් සුද යාමේ තත්වය උත්සන්න වන කාලපරිච්ඡේද පවතී.සෑම කෙනෙකුටම මෙය අදාල නොවිය හැක.

• මන්ද පෝෂණ අවස්ථා වලදී හා ශරීරය ගිලන් වු අවස්ථා වලදී .

මෙය ශරීරයේ පිත ධාතුව ආවේග වන අවස්ථාවක් වේ.එහි ප්‍රථිඵලයක් ලෙසට ශ්වේත ප්‍රදර තත්වය ඇතිවේ.

• තද ශීත කාලගුණ අවස්ථා වලදී.

• දරු ප්‍රසූතියකින් පසුව.

• ඔපස් දිනයට ආසන්න පෙර හා පසු කාලය .

• ඩිම්බ කෝෂ ආශ්‍රිත සංකූලතා.

මෙවැනි අවස්ථා නොසලකා හැරීම නිසා පසුකාලීනව දරුවන් නොමැති වීම හා දරුගැබ ගබ්සා වීමේ තත්ව ඇති විය හැකිය.

මෙම රෝගයේ මූලික අවස්ථාවේදීම සුදුසුකම් ලත් වෛද්‍යවරෙක් වෙතට යොමු වන්න.ආයුර්වේද වෛද්‍ය විද්‍යාවට තුලදී මෙය නිට්ටාවටම සුවකල හැකි අතර ඔබ ඖෂධ ලබාගන්නා අවස්ථා වලදී ඔබ සමහර පිලිවෙත් වලට යොමුවිය යුතුය .

• ශරීරයේ පිත අවේග කරන උෂ්ණ ආහාර වලින් නිරතුරුව වැලකිය යුතුය .

• සනීපාරක්ෂක පුරුදු පිළිබඳව වැඩි අවධානය යොමු කරන්න .

ඔපස් අවස්ථා වලදී ස්නානය අනිවාර්‍ය වේ.ලිංගේන්ද්‍රය ආශ්‍රිතව පිරිසිදුව හා වියලිව තබාගන්න .පිරිසිදු කපු වලින් නිමවූ ඇදුම් පරිහරණය කරන්න .

• මානසික ආතතියෙන් හැකිතාක් මිදෙන්න.

• හැකිතරම් ජලය පානය කරන්න .

රෝගී අවස්ථා වලදී ත්‍රිපලා පානය ගුණදායක වේ.බෙහෙත් නෙල්ලි හැපීමද ඔබට සිදු කල හැකිය.

මෙම රෝගී අවස්ථා වලදී මුත්‍රා නොයෑමේ තත්වයක් පවතීනම් ,කැකිරි ගෙඩියක් මගින් පානයක් සාදා එය බොන්න.පනු ආසාදන වලින් වැලකී සිටීමට නිසි කාලයේදී පනුවන් සදහා ඖෂධ ලබාගන්න .

දේහ උෂ්ණත්වය අවම කරන ආහාර ලෙසට හාතාවාරිය කැද හා ඉරමුසු කැද පානය කරන්න.කෑමට සුදුසු පලතුරු ලෙස කළු උක්,දෙළුම් ,නෙල්ලි ,කැකිරි,කොමඩු හැදින්විය හැකිය.

වර්තමානයේ දී මෙම රෝගයට ප්‍රථිකාර ලබා ගැනීමට  ආයුර්වේද වෛද්‍ය විද්‍යාව වෙතට යොමු වන අයගේ පහසුව වෙනුවෙන් ගුණාත්මක ලෙස සකස් කල ඖෂධ වර්ග නිපදවා ඇත.රෝගීන්ට තමන්ගේ එදිනෙදා ජීවිතයට බාධා නොවන අන්දමින් එම ඖෂධ භාවිතා කළ හැකිය.


D.H.S.L

ලිපියේ ගුණාත්මකභාවය පිළිබඳව ලකුණු ලබාදීම සදහා ලිපියේ පහළින් ඇති " ලිපියට ලබා දෙන
 ලකුණු " තීරුවේ ඔබේ මනාපය ✔පලකරන්න.


නවතම ලිපි පහසුවෙන් ඔබට පරිශීලනය කිරීම සදහා අපගේ " දිනපොත - Dairy " Facebook පිටුව සමග මෙතනින් (❉❉❉❉❉) එකතුවන්න.
**********************

ගැස්ට්‍රයිටිස් / ආමාශයික ප්‍රදාහය ( Gastritis )

අම්ල පිත්ත රෝගය (Hyper Acidity) පිළිබඳව ආයුර්වේද වෛද්‍ය විද්‍යාත්මක පැහැදිලි කිරීම 

❁❁❁❁❁❁❁❁❁❁❁❁❁❁❁❁❁❁

"බඩේ ගෑස්
හිතේ කහට
දණිස්සේ වතුර
ලේ වල සීනි "

වර්තමාන සමාජයේ ඇති සමහර බෝනොවන රෝගී තත්ව මෙලෙස කෙටිකර දැක්විය හැකිය .මේවා එකතු කර ඔබට අවශ්‍ය නම් රසවත් තේ කෝප්පයක් වුවද සාදාගත හැකිය.

❅❅❅❅❅❅❅❅❅❅❅❅❅

ඉහත සදහන් කල ආකාරයට ගැස්ට්‍රයිටිස් (Gastritis) රෝගය වර්තමානය සමාජයේ කෙතරම් බහුලවීද යත් එහි ආමන්ත්‍රණයේ පහසුව තකා සමාජය තුළ රෝගයේ නම "ගෑස්" හෝ "ගෑස්ටික්" ලෙසට වෙනස් වී ඇත.මෙම ගැස්ට්‍රයිටිස් රෝගය සදහා මූලිකම හේතුව වන්නේ කාර්‍යබහුල ජීවන පැවැත්මයි.

බොහෝ අවස්ථා වලදී සමහර අයවළුන් ගැස්ට්‍රයිටිස් (Gastritis) රෝගය හා අම්ල පිත්ත රෝගය එකක් ලෙසට සලකයි.ආයුර්වේද වෛද්‍ය විද්‍යාවට අනුව අම්ල පිත්ත රෝගය(Hyper acidity ) පුළුල් පරාසයක් ඇති රෝගයක් වන අතර එහි එක් අංශයක් ලෙසට ගැස්ට්‍රයිටිස් (Gastritis) රෝගය හැදින්විය හැකිය.ගැස්ට්‍රයිටිස් රෝගය පිළිබඳව හැදෑරීමට වඩා එහි මූලික/ප්‍රධාන ආකාරය වන අම්ල පිත්ත රෝගය (Hyper acidity) ගැන හැදෑරීම සුදුසු වේ.

අම්ල පිත්ත රෝගය යනු,ආහාර ජීර්ණ පද්ධතිය ආශ්‍රිතව සෑදෙන රෝගී තත්වයකි.බොහෝ අවස්ථා වලදී එම රෝගයටම ආවේණික වූ රෝගී ලක්ෂණ පවතී.මෙම රෝගය සදහා මූලික හේතුව වන්නේ, නූතන කාර්‍යබහුල ජීවන ක්‍රමයයි.

ආයුර්වේද වෛද්‍ය විද්‍යාවට අනුව අම්ල පිත්ත රෝගය දෙයාකාර වේ.මෙම දෙයාකාරයට අනුව සෑදෙන රෝගී ලක්ෂණ ද දෙයාකාර වේ.

1. ඌර්ධවගත අම්ල පිත්තය

2. අධෝගත අම්ල පිත්තය

අම්ල පිත්තය යනු ,ආහාර ජීර්ණ පද්ධතිය ආශ්‍රිත රෝගී තත්වයක් වේ.ආයුර්වේද වෛද්‍ය විද්‍යාවට අනුව රෝගයක් හටගැනීම සිදුවන්නේ තුන්දොස් කිපීම මගිනි.අම්ල පිත්ත රෝගය පිත්තජ රෝගයක් වන අතර අවශේෂ කරුණු ලෙසට සෙම සහ වාතය කිපීමක්ද සිදුවිය හැකිය .

ශරීරයේ පවතින පිත දෙයාකාර වේ.

• ප්‍රකෘති පිත

මෙය දේහය හොදින් පරිපාලනය කරයි.මෙය කටුක බවකින් යුක්තය .සිරුරට සැප ලබාදෙයි.

• විකෘති පිත

වඩාත් අම්ලාදික වේ.පිත්තජ රෝග ඇතිවිමට දායක වේ.අම්ල පිත්ත රෝගය සෑදීම සදහා දායක වන්නේ මෙම විකෘති පිත වේ.එනම් ,අම්ල පිත්ත රෝගයේදී කෝප වන්නේ මෙම විකෘති පිතයි.මෙය අම්ලාදික නිසා "ඇඹුල් වූ පිත" , අම්ල පිත්තය ලෙසට ව්‍යවහාර වී ඇත.

අම්ල පිත්ත රෝගය සෑදීම සදහා ප්‍රධාන වශයෙන් හේතු කිහිපයක් පවතී.මෙම හේතු නිසා විකෘති පිත කිපීමක් සිදුවේ.

1. එකිනෙකට විරුද්ධ ආහාර වර්ග අනුභවය

2. නරක් වූ ආහාර වර්ග හෝ විශේෂ රසකාරක වර්ග යොදා සාදන ලද ආහාර ශීතකරණ වල තබා කල්ගත වී ආහාරයට ගැනීම

3. සැර සහ ඇඹුල් වර්ග වැඩි ආහාර නිතර ආහාරයට ගැනීම

4. විදාහී ආහාර හෙවත් සැර / දැවිල්ල ඇති කරන ආහාර නිතර අනුභවය

( රතු මිරිස් යෙදු ආහාර ,විනාකිරි යෙදූ ආහාර ,අබ යෙදූ ආහාර ආදිය )

5. මත්පැන් ,කිරෙන් තැනූ මෝරු ආදි පිත ඇවිස්සීමට ලක්කරන ආහාර අනුභවය

මෙම හේතු වලට අමතරව වර්තමානය ජනජීවිතය ආශ්‍රිත හේතු මගින්ද බොහෝ අවස්ථා වලදී මෙම අම්ල පිත්ත රෝගි තත්වය ඇතිවීම හෝ එය උත්සන්න වීම සිදුවිය හැකිය .

1. ක්ෂණික ආහාර වර්ග සහ කෘතීම බීම වර්ග වැඩිවාර ගණනක් භාවිතා කිරීම.

2. බටහිර හෝ ආයුර්වේද ඖෂධ නිසි වෛද්‍ය නිර්දේෂයකින් තොරව භාවිතා කිරීම.

3. විෂ සහිත රැකියා ආශ්‍රිතව සේවය කිරීම.

4. මත්පැන් පානය දුම් පානය හා අන්තරායකර ඖෂධ (මත්කුඩු වර්ග ගංජා,කංසා.....) වර්ග භාවිතය .

5. නිසි වේලාවට ආහාර නොගැනීම සහ ආහාර ගෙන දිරවීමට පෙර වරින් වර ආහාර ගැනීම.

 ( ප්‍රධාන ආහාර වේල් අතරතුර ගන්නා වූ ක්ෂණික ආහාර )

6. රාත්‍රියේදී නිදි වැරීම සහ දහවල් කාලයේදී අනවශ්‍ය ලෙසට නිදාගැනීම.

7. මානසික ආතතිය අධික වශයෙන් දීර්ඝ කාලයක් පැවතීම .

මෙවන් හේතු මගින් අම්ලපිත්ත රෝගය පමණක් නොව තවත් බෝ නොවන රෝග රැසකට පදනමක් වේ.

ඌර්ධවගත අම්ලපිත්ත රෝගය සදහා විකෘති පිත මෙන්ම සෙමද සම්බන්ධ වේ.අම්ල පිත්ත රෝගයේ බොහෝ දෙනා අතර වඩා සුලභ ආකාරය වන්නේ මෙම ඌර්ධවගත අම්ල පිත්ත රෝගී තත්වයයි.ඌර්ධවගත අම්ලපිත්ත තත්වය අමාශය හා ඉන් ඉහල ප්‍රදේශ තුළ ක්‍රියාකරයි.එනම් ,ආමාශය සහ ගලනාලය / අන්නස්‍රෝතය ආශ්‍රිතව වේ.

සෙම සමග එකතු වූ විකෘති පිත ඌර්ධවගත අම්ලපිත්ත රෝගයේදී විවිධ රෝග ලක්ෂණ ඇතිකරයි.

• සෙම සහිත වමනය ඇතිකිරීම.(අධික සෙම තත්වයක් පවතී )

• ඔක්කාරය සමග උගුරට ඇඹුල් රසක් දැනේ.

• බඩේ,පපුවේ හා උගුරේ තද බල දැවිල්ලක් ඇතිකරයි.

• තදබල හිසේ කැක්කුමක් ඇතිවිය හැකිය.

• අත් පාද වල දැවිල්ලක් හා උණ ගතියක් ඇතිවේ .

• ශරීරය කැසීම සහ ඇගේ පළු දැමීමක් විය හැකිය.

අධෝගත අම්ලපිත්ත රෝගය ඌර්ධවගත අම්ලපිත්ත රෝගය මෙන් සුලභ රෝගයක් නොවේ.මෙහිදී සෙම සම්බන්ධ නොවී විකෘති පිත මගින් පමණක් රෝගය ඇතිවී රෝගී ලක්ෂණ පෙන්නුම් කරයි.

• පිපාසය

• දැවිල්ල හා කැරකිල්ල

• ඔක්කාරය

• බඩගිනි අඩුබව

• දහදිය ගැලීම හා සමේ බිබිලි ඇතිවීම

• ශරීරය කහ පැහැති වීම.

මුලින්ම මෙම අම්ල පිත්ත රෝගය මුල් අවස්ථාවේදී දැනගත් විට ආයුර්වේද වෛද්‍යවරෙක් හමුවී වෛද්‍ය ප්‍රථිකාර ලබාගැනීම සුදුසු වේ.

ඔබට අම්ලපිත්ත රෝගී තත්ව ඇත්නම් පලමුව කල යුත්තේ වෛද්‍ය උපදෙස් පැතීමයි .ඊට හේතුව වන්නේ ඔබට එම රෝගී තත්ව හමුවේ වෙනත් රෝගයක් පැවතිය හැකි වීමයි.උදාහරණ ලෙසට පහත රෝග දැක්විය හැකිය .

1. හෘදයාබාධ

2. ආමාශයේ තුවාල හෝ වණ

3. ආමාශයේ පිළිකා

4. අග්න්‍යාසදාහය

එවැනි ප්‍රථිකාර ලබා ගන්නා රෝගියෙක් මෙන්ම දැනට නීරෝගීව සිටින අයෙකු වුවද නිසි පිලිවෙත් අනුව ජීවත්වන්නේ නම් අම්ලපිත්ත රෝගයෙන් තොර නීරෝගී ජීවිතයක් ගත කළ හැකිය .එවැනි පිළිවෙත් කිහිපයක් පහත පරිදි වේ.

• දවසේ ප්‍රධාන ආහාර වේල් තුන නිසි වේලාවට මනාකළමණාකාරීත්වයක් ඇතිව ගැනීම .

• ප්‍රධාන වේල් අතරතුරදී මද උණුසුම් උණු වතුර පානය කිරීම.

• ප්‍රධාන ආහාර වේල් අතරතුරදී බඩගින්නක් නොදැනේ නම් කිසිදු ආහාරයක් නොගන්න,එසේ ආහාරයක් ගතයුතු නම් පමණක් අළුත සෑදූ තෙල් රහිත ආහාරයක් අනුභව කරන්න .(ඒ සමගම ජලය පානය කිරීම අත්‍යාවශ්‍ය වේ.)

• ක්ෂණික ආහාර ,කෘතීමව බීම වර්ග ,රසකැවිලි වර්ග ,තෙල් සහිත ආහාර,අධික සැරක් සහිත ආහාර,ඛේථ ග්‍රන්ථි උද්දීපනය කරන බබල්ගම් වර්ග ආහාරයට නොගන්න .

• තේ , කෝපි පානය අවම කරන්න ,ඒ වෙනුවට පලතුරු , ඔසුපැන් හෝ ජලය සදහා හුරුවන්න.

• රාත්‍රියේ නිදි වැරීම හා අධික කුසීත බවින් දහවල නිදාගැනීමෙන් වලකින්න.

• ආතතිය පාලනය කරගන්න .

ආතතිය දුරලීම සදහා සංගීතයට සවන් දිම,භාවනා කිරීම,පොත් කියවීම සහ තමන්ට උචිත විනෝදාංශයකට යොමුවන්න .

• තද අව්වේ නොසිටින්න.

• මලපහ ,මුත්‍රා පිටනොකර නොසිටින්න.

• අථි මෛථුතන්‍යයෙන් වලකින්න .

අම්ලපිත්ත රෝගය සදහා විශේෂ ආහාර වර්ග කීහිපයක් අගුණ වේ.ඒවනම් ,

• අධික තෙල්,වියළි මිරිස් හා කුළුබඩු යෙදු ආහාර

• ඇඹුල් ආහාර

• අබ , විනාකිරි , රට දෙල් , උෂ්ණ මාළු , කරවල ,ගෝව,මුරුංගා,මාළුමිරිස්,අච්චාරු,ලුණුදෙහි,තක්කාලි ,හරක් මස්,ජාඩි,චොකලට් වර්ග ,පාන්පිටි ආහාර

අම්ලපිත්ත රෝගීන් සුවපත් වීමට සහ නීරෝගී පුද්ගලයින් සදහා තවදුරටත් රෝගය නොසෑදීමටද ප්‍රත්‍ය / සුදුසු ආහාර වර්ග පවතී.

• එළකිරි

• සියළු පළා වර්ග

අමුවෙන් ආහාරයට නොගත යුතුය .හොදින් පිසගෙන ආහාරයට ලබාගන්න .

• තැඹිලි ,කුරුම්බා ,කැකිරි ,කොහිල ,පොලොස් ,කවුපි ,මුංඇට ,අනෝදා ,ගම්මිරිස් ,සුදුළූනු ,උලුහාල් ,බතල ,වට්ටක්කා,පතෝල, වැටකොළු,අළුකෙසෙල්

මෙම අම්ලපිත්ත රෝගය සදහා ප්‍රථිකාර ගැනීම සිදුනොකලහොත් පිත්ත අම්ලය මගින් ආමාශ බිත්තිය තුවාල වී වණ හටගැනීමක් සිදුවේ.එය රක්තහීනතාවය මෙන්ම පිළිකා තත්ව බවට පත්විය හැකිය .

ආයුර්වේද වෛද්‍ය විද්‍යවේදී විවිධ ක්ෂාය වර්ග ,චූර්ණ මගින් මෙම තත්වය ප්‍රත්‍යක්ෂ වශයෙන් සුවකළ හැකිය .අවශ්‍ය වන්නේ රෝගියා අප්‍රත්‍යය හැසිරීම් වලින් වැලකීම හා නිසි ආකාරයට ඖෂධ වර්ග පිළිපැදීමයි.

D.H.S.L

✿✿✿✿✿✿✿✿✿✿

Facebook ඔස්සේ " දිනපොත - Dairy " පිටුව සමග සම්බන්ධ විම සදහා මෙතනින් (✿✿✿✿✿) පිවිසෙන්න.

මලබද්ධය

මලබද්ධය පිළිබඳව ආයුර්වේද වෛද්‍ය විද්‍යාත්මක මතය.

                   ❃❃❃❃❃❃❃❃❃❃❃❃❃❃❃

මෙය බොහෝ දෙනෙකු සමාජයක් ඉදිරිපිට සාකච්ඡා කිරීමට අකමැති මාතෘකාවක් වේ.කෙතරම් රසමසුළු ආහාරයට ගත්තත් ජීර්ණයේ අවසාන ඵලය වන්නේ අර්ධ ජීරණය වූ මලද්‍රව්‍යය වේ.

රස නහර පිනවා ආහාර ලබාගැනීම බොහෝදෙනෙක්ට පාහේ සතුටුදායක කාර්යයක් මෙන්ම නිසි ආකාරයෙන් මලද්‍රව්‍යය පිටවීමද එලෙසම සතුටුදායක කර්තව්‍යයක් වේ.ඔබ ඒ පිළිබඳව සමාජය ඉදිරියේ කීමට ලැජ්ජා වුවත් මදක් ඔබේ සිතින් ඒ පිළිබඳව ප්‍රශ්න කරන්න ,පිලිතුර ඔබටම ලබාගත හැකිය.

මලබද්ධය යනු,අප ආහාරයට ගන්නා වූ ආහාර ජීර්ණයේ ප්‍රථිඵලයක් ලෙසට ආහාර ජීර්ණ පද්ධතියේ අවසාන ඵලය ලෙසට සෑදුනු මලද්‍රව්‍යය බැහැර කිරීමේ අපහසුතාවයයි.මෙය ආහාර ජීර්ණ පද්ධතිය ආශ්‍රිත රෝගයකි.මලබද්ධය මුල් අවස්ථාවේදී මල පිටකිරීමේ අපහසුතාවයක් ලෙසට ඇති වී ක්‍රමයෙන් වෙනත් සංකූලතාවයන් ඇතිකරමින් රෝගී තත්වයක් බවට පරිවර්තනය වේ.

ආහාර ජීර්ණ පද්ධතියේ ගුදයට පෙර ඇති අවසාන කොටස වන්නේ මහාන්ත්‍රයයි.මෙම මහාන්ත්‍රය මගින් ආහාරයේ ඇති ජලය අවශෝෂණය කරයි.

මහාන්ත්‍රය තුළ ආහාර දීර්ඝ කාලයක් රැදීම නිසා මලද්‍රව්‍යය වලින් මහාන්ත්‍රය අවශෝෂණය කරන ජල ප්‍රමාණය අධික වේ.සාමාන්‍යයෙන් ජීරණය වූ ආහාරයෙන් 80% ක් පමණ ජලය  අවශෝෂණය කරගන්නේ මෙම මහාන්ත්‍රය තුලදී වේ.මෙලෙස මහාන්ත්‍රය තුළ මලද්‍රව්‍යය රැදෙන කාළය අධික වීම සහ අන්ත්‍ර වල මන්දගාමී චලන නිසා මෙවැනි මලබද්ධ තත්වයන් ඇතිවේ.

සාමාන්‍යයෙන් අයෙකු පුරුද්දක් වශයෙන් දිනකට වරක් හෝ දෙවරක් මලපහ පිටකිරීම සිදුකරයි.විටෙක අයෙකු දින දෙකකට තුනකට එක් වතාවක් පමණක් වුවද පුරුද්දක් වශයෙන් මලපහ පිටකල හැකිය.එවැනි තත්වයන් මලබද්ධ තත්වයන් ලෙසට සැලකිය නොහැක .මලද්‍රව්‍යය පිටකිරීමේදී අපහසුතාවයක් ඇතිවී ස්වකීය පුද්ගලයා අනවශ්‍ය ලෙසට තැටමීමක් සිදුකරයි නම් එය මලබද්ධ තත්වයක් වේ.

ආයුර්වේද වෛද්‍ය විද්‍යාවට අනුව මලබද්ධය ප්‍රධාන වශයෙන් වාතජ දෝෂයක් නිසා හටගන්නා වූ රෝගයක් වේ.නමුත් ,මෙයට පිත්තජ දෝෂ හා කඵජ දෝෂ අවශේෂ වශයෙන් හේතු විය හැකිය.උෂ්ණ කාලවලදී ශරීරයේ ඇතිවන විවිධ වෙනස්කම් නිසා මලද්‍රව්‍යය වියළි තත්වයට පත්වේ.එහිදී කඵජ දෝෂ නිසා මල වල ඇලුණු ස්වාභාවයක් ඇතිවේ.එමනිසා සෙම මගින් මල ගමන් කරන මාර්ගය අවරෝධකර මලබද්ධ තත්වය ඇතිකරවයි.

සමහරුන්ට උපතින්ම මලබද්ධ තත්වයන් ඇතිවිය හැකිය.තවත් අයට ගර්භණීභාවයේදී මෙන්ම වයසට යෑමේදිත් මලබද්ධ තත්වයන් ඇතිවිය හැකිය.එනම්,වාතජ දෝෂ ,පිත්තජ දෝෂ සහ කඵජ දෝෂ ඇතිවන අවස්ථාව අනුව මෙම රෝගය ඇතිවීම ඕනෑම අවස්ථාවකදී සිදුවිය හැකිය .

ආයුර්වේද වෛද්‍ය විද්‍යාවට අනුව මලබද්ධය ඇතිවිම සදහා එදිනෙදා චර්‍යාත්මක වෙනස්කම් මෙන්ම මානසික වෙනස්කම් ද හේතු වශයෙන් බලපායි.

1. පුරුද්දක් වශයෙන් චර්‍යාත්මකව මලද්‍රව්‍යය පිටකිරිම සදහා නිසි වේලාවක් ඇතිකර නොගැනීම
.
2. තන්තු / කෙදි සහිත ආහාර භාවිතයේ අඩුකම.

3. ජලය පානය කිරිමේ අඩුබව සහ ප්‍රමාණවත් නොවන පරිදි ආහාර ලබාගැනීම.

4. ඉක්මන්බව නිසා මලද්‍රව්‍යය නියමිත ලෙසට පිටවීමට ඉඩලබා නොදී අධික ලෙසට තැටමීම නිසා මලද්‍රව්‍යය මගින් එම මාර්ගය අවහිර වීම.

5. මානසික ආතතිය දීර්ඝකාලීනව පැවතීම .

6. ගර්භණීභාවය හා වියපත් වීම වැනි වාතජ ,පිත්තජ හා කපජ දෝෂයන් ඇතිවන අවස්ථාවන්.

7. සමහර රෝග වලට භාවිතා කරන ඖෂධ වල බලපෑම.එවැනි රෝග කිහිපයක් නම් ,

• මධුමේහය , වාත රෝග , ආන්ත්‍ර වල පිළිකා තත්ව , අන්ත්‍ර වල පටුවීමට ලබාගනනා ඖෂධ ,තයිරොයිඩ් ග්‍රන්ථයේ රෝග , සුසුම්නා ආඝාත තත්වයන් , මාංශ ක්ෂය වීම්

මෙම මලබද්ධ රෝගී තත්වයට මුල් අවස්ථාවේදී ප්‍රථිකාර නොකිරීමකදී කල්‍ යත්ම විවිධ සංකූලතාවයන් ඇතිවිය හැකිය .

• මලද්‍රව්‍යය බැහැර කිරීමේ අපහසුතාවය

• මලද්‍රව්‍යය ඝනව හෝ කැට වශයෙන් බැහැර විම සහ ඒ සදහා දිගු කාළයක් ගැනිම.

දිගු වේලාවක් අපහසුවෙන් මලද්‍රව්‍යය බැහැර කිරීම නිසා එය වේගවත් කරගැනීමේ අදහසින් රෝගියා විසින් තැටමීම සිදුකරයි.එහිදි වෙනත් අනිසි ප්‍රතිඵල වලට රෝගියා බදුන්වේ.

ගුද මාර්ගය ආශ්‍රිත පේශි වල දුර්වලතාවයක් එහිදී ඇතිවේ.එමගින් ගුද මාර්ගයේ අවසානයේ ඇති ගුද චක්‍ර පිධානය කෙරෙහි බලපෑම් ඇතිවී මලද්‍රව්‍යය පිටවීම සිතාමතා පාලනය කළ නොහැකි තත්වයක් ඇතිවේ.

• උදරයේ වේදනාව , බඩ පුරවා දැමීම, උදරයේ බර බව හා හිසරදය ඇතිවේ.

මේ සමගම නිතැතින්ම ආහාර අරුචියද ඇතිවේ.එනම් ,මලද්‍රව්‍යය පිටවීම නිසි ආකාරයෙන් සිදුනොවෙන අවස්ථා වලදී ආහාර අනුභවය සදහා ද නිසි ආකාරයට සිදුනොවේ.

• අර්ශස් තත්ව , හර්නියා තත්ව , අධික තැටමීම නිසා ගුද මාර්ගය පහත් විම සහ කාන්තා යෝනි මාර්ගය පහත් වීමේ අවධානමක් පවතී.

මේ ආකාරයට මලබද්ධය දීර්ඝකාලීනව පැවතීම නිසා ඇතිවන සංකූලතාවලින් වැලකීමට සහ නීරෝගී පුද්ගලයෙකුට මලබද්ධය ඇති නොවීම සදහා ආයුර්වේද වෛද්‍ය විද්‍යාවට අනුව පහත ක්‍රියාවලීන් වල නිරත විය යුතුය .

• පෝෂ්‍යදායක සමබල ආහාර වේලක් ලබාගන්න.
ධාන්‍ය වර්ග,අල වර්ග ,එළවළු වර්ග ,පළතුරු වර්ග ,කිරි ආදිය නිසි ප්‍රමාණ වලින් අඩංගු විය යුතුය .

• හැකිතාක් දුරට ජලය පානය කරන්න.

එමගින් ,මහාන්ත්‍රය තුළ ජල අවශෝෂණය කලත් මලද්‍රව්‍යය තුලද තවත් ජල ප්‍රමාණයක් ඉතිරි වීම නිසා මලද්‍රව්‍යය වලට නිසි ස්නේහකතාවයක් ලැබේ.එමනිසා මලද්‍රව්‍යය පිටකිරීමේ අපහසුතාවයක් ඇතිනොවේ.

• කෙදි / තන්තු බහුල ආහාර වැඩිපුර ආහාරයට ගන්න.
(එළවළු ,පලතුරු ,කුරුට්ට සහිත ධාන්‍ය වර්ග,රනිල කුලයේ ශාඛ ආදිය)

කෙදි / තන්තු  දේහය තුලදී ජීරණය නොවන බැවින් ආහාරයේ පරිමාව එමගින් වැඩිවේ.අන්ත්‍ර වල චලනයන් වැඩිකිරීම මගින් කෙටි කාලයක් තුලදී මලද්‍රව්‍යය පිටකිරීමට සලස්වයි.ආන්ත්‍ර බැක්ටීරියා වල ක්‍රියාකාරීත්වය වැඩිකිරීමටද තන්තු දායක වේ.

• තමන්ගේ දිනචර්‍යාවේ නියමිත වූ වෙලාවකට සිදුකරන පුරුද්දක් බවට වැසිකිලි යාම හා මලද්‍රව්‍යය පිටකිරිම සිදුකරන්න .

කාර්‍යබහුලත්වය නිසා සමහරුන් මෙම මලපහ බැහැර කිරීමේ අවශ්‍යතාවය පසුවට කල්දමයි.ඉන් සිදුවන්නේ මලද්‍රව්‍යය මහාන්ත්‍රය තුළ පවතින කාලය වැඩිවී ඉන් අධික ලෙසට ජලය අවශෝෂණය වී මලද්‍රව්‍යය වල ස්නේහකතාවය අඩුවීමයි.

• උදෑසන අවදි වූ පසුව මද උණුසුම් උණු වතුර වීදුරුවක් පානය කරන්න .

හැකියාවක් ඇත්නම් කාලසටහනකට අනුව කොළකැද වීදුරුවක් ද පානය කරන්න.

• ආහාර මුඛය තුලදී හොදින් විකා සෙමින් අනුභව කරන්න .

ආහාර දත් මගින් විකීමේ ගැටළු ඇතිවූ විටෙක එහි ජීරණය ද ගැටළු සහගත වී මලද්‍රව්‍යය පිටකිරීමේ අපහසුතාවයන් ඇතිවේ.

• මානසික ආතතිය අවමකර ගැනිම සදහා භාවනාව හෝ යෝග ව්‍යායාම වල නිරත වන්න.

• දුම්බීම හා මත්පැන් පානයෙන් වැලකිම.

මලබද්ධය රෝගීන්ගේ මෙන්ම මලබද්ධය ඇතිවීම වැලැක්වීමට කටයුතු කරන නීරෝගී පුද්ගලයින්ගේද එදිනෙදා ආහාරයට පහත දෑ එක්වීම යෝග්‍ය සහගත වේ.

කොළ පැහැති එළවළු , පලතුරු , වට්ටක්කා , පිපිඤඤා , කැකිරි , නිවුඩ්ඩ සහිත සහල් , මුං ඇට , කඩල , කව්පි , කොහිල , ගොටුකොළ , කතුරුමුරුංගා , නිවිති, ගැටතුඹ,කුරක්කන්.

මෙවැනි ආහාර පිලිවෙත් මගින් හා චර්‍යාත්මක මනාකළමණාකාරීත්වය මගින් මලබද්ධ රෝගය සුවවීම හෝ රෝගය පාලනය වීමක් සිදුවේ .ඉන්පසුව ආයුර්වේද වෛද්‍යවරයා විසින් නියමකරන ඖෂධ ලබාගැනීම මගින් රෝගී තත්වය සමනය කරගත හැකිය .

D.H.S.L

✿✿✿✿✿✿✿✿✿✿✿✿✿✿✿

Facebook ඔස්සේ " දිනපොත - Dairy " පිටුව සමග සම්බන්ධ විම සදහා මෙතනින් පිවිසෙන්න.

මධුමේහය / දියවැඩියාව (Daibetes )

"මධුමේහය"/ දියවැඩියාව ( Daibetes ) පිළිබඳව ආයුර්වේද වෛද්‍ය විද්‍යාත්මක මතය හා ප්‍රථිකාර ක්‍රම

✿✿✿✿✿✿✿✿✿✿✿✿✿✿✿✿✿✿

÷ "ඇයි,මේ ඔයා ගොඩාක් කෙට්ටු වෙලා"

÷ " මට මේ දවස් වල සීනි නේ,ඒකයි මේ......"

මෙය මාහට කන වැකුණු දෙබසකි.සමහර විටෙක මෙවැනි කතා ඔබටත් ඇසී ඇතැයි මා සිතමි,එමෙන් ඔබත් විටෙක දියවැඩියා රෝගියෙකු විය හැකිය.

දියවැඩියාව ආයුර්වේද වෛද්‍ය විද්‍යාවේදී "මධුමේහය" නමින් හදුන්වයි.දියවැඩියාව (Daibetes) යනු,බෝනොවන රෝගයකි.නූතන පරීක්ෂණ අනුව මෙය සෑදීම සදහා ප්‍රවේණික සාධක බලපෑම් ඇතිකරත් මෙම රෝගය සෑදීමේ ප්‍රධාන හේතුව වන්නේ මනා කළමණාකාරීත්වයෙන් තොර වූ ජීවිත පැවැත්මයි.

මධුමේහය (Daibetes) යනු,රුධිරයේ පවතින ග්ලූකෝස් ප්‍රමාණය නියමිත අගයට වඩා වැඩි ප්‍රමාණයක් පැවතිමයි.

දියවැඩියාව යන වචනය සමග නිතරම කියවෙන අනික් වචනය වන්නේ "ඉන්සියුලින්" යන්නයි.දියවැඩියාව ඇතිකිරීමට බලපෑම් ඇතිකරන්නේ මෙම "ඉන්සියුලින්" නැමැති රසායනිකයයි.

"ඉන්සියුලින්" යනු,හෝමෝනයක් (Hormone ) වේ.මෙය "අග්න්‍යාසය" නැමැති ග්‍රන්ථය තුළ නිපදවීමක් වේ.අප ලබාගන්නා ආහාර වලින් අවසානඵලය වන ග්ලූකෝස් (Glucose ) සෛල තුලට ඇතුළු කරගැනීම යාමනය කිරීම මගින් රුධිරයේ ග්ලූකෝස් ප්‍රමාණය නියමිත අගයක පවත්වාගැනීම ඉන්සියුලින් හෝමෝනය මගින් සිදුකරයි.මෙම හෝමෝනය නිපදවීමේ ශීඝ්‍රතාවයේ අඩුකම හෝ නිපදවන ඉන්සියුලින් වල ක්‍රියාකාරීත්වයේ දුර්වලතාවයක් නිසා මධුමේහය තත්වය ඇතිවේ.

ආයුර්වේදයට අනුව දියවැඩියාව /මධුමේහය සෑදීම සදහා ජීවන ක්‍රමයේ බලපාන හේතු වන්නේ ,

1. උදාසීන දිවිපෙවෙත හා අධික කම්මැලි බව

2. ශාරීරික ව්‍යායාම අවම වීම හා අධික පැය ගණනක් නිදාගැනීම.

3. අධික ලෙස මීකිරි ආහාරයට ගැනීම හා ගෘහාශ්‍රිතව ඇතිකරන සතුන්ගේ(කුකුළන් ,එළුවන් ,ඌරන්,......) මස් අධික වශයෙන් අනුභවය හා මස් වල සුප් අධික ලෙස පානය කිරීම.

4. ජලයේ වෙසෙන සතුන්ගේ (කකුළුවන් ,බෙල්ලන්,ඉස්සෝ)මස් හා ඒවායින් සාදන සුප් අධික ලෙසට පානය කිරීම.

5. අධික ලෙසට කිරි පානය කිරීම .

6. අළුත් ධාන්‍ය වර්ග හා ඒවායින් සෑදූ වෙනත් ආහාර වර්ග ,සීනි හා තෙල් සහිත ආහාර අධිකව ආහාරයට ගැනීම

7. අධික ලෙසට මානසික ආතතියක් පැවතීම .

මධුමේහය මගින් දේහයේ විවිධ කොටස් වලට බලපෑම් ඇතිකරයි.එනම් ,විවිධ කොටස් ආශ්‍රිතව විවිධ සංකූලතාවයන් ඇතිවිය හැකිය.

1. ඇස් ආශ්‍රිතව බලපෑම් ඇතිකරමින් ග්ලූකෝමා තත්වය ඇතිකිරීම නිසා ඇස් අන්ධ වීම.

2. පාද ආශ්‍රිතව සංකූලතාවය නිසා හිරි වැටීම.

3. පාද වල හිරි වැටීම නිසා තමන්ට නොදැනීම පාද වල තුවාල ඇතිවීම,පාද කරු කැපිම හා පාද වල අසාමාන්‍ය දැවිල්ලක් ඇතිවිම.

4. වකුගඩු අකර්මණ්‍ය වීමේ අවදානමක් පවතී .

5. මතක ශක්තිය හීනවීමේ අවධානමක් ඇත.

6. ලිංගික අප්‍රාණිකත්වය ඇතිවීම.

සාමාන්‍ය පුද්ගලයන්ට මධුමේහය නිසා බොහෝ වශයෙන් ඇතිවෙන අපහසුතාවය වන්නේ පාද වල සංකූලතාවයන් ඇතිවීම නිසා පාද හිරිවැටීම හා නොදැනුවත්වම තුවාල ඇතිවීමයි.බටහිර වෛද්‍ය විද්‍යාවේදී සිදුකරන්නේ ඖෂධ වලින් මෙම තුවාල සුව නොවූ පසු ශල්‍යකර්මයන් සදහා රෝගීන් යොමුකිරීමයි.

නමුත් ,ආයුර්වේද වෛද්‍ය විද්‍යාවේදී මුලින්ම රුධිරයේ අඩංගු සීනි ප්‍රමාණය නිසි ආකාරයෙන් යාමනය සදහා ප්‍රථිකාර කරයි.දෙවනුව පාද වල ස්නායු උත්තේජනය කිරීම සදහා විශේෂිත තෛල ප්‍රථිකාර ක්‍රම භාවිතා කරයි.එහිදී පාද වල තුවාල සෑදී ඇත්නම් ශල්‍යකර්ම වලින් තොරව තුවාල සුවකල හැකි ආයුර්වේද ඖෂධ යොදාගැනීමක් සිදුවේ.

ආයුර්වේද වෛද්‍යවරයෙක් හමුවට මධුමේහ රෝගියෙකු පැමිණි පසු මුලින්ම මෙම රෝගියා ඔහුට හෝ ඇයට ඇති රෝග තත්වය අනුව හා රෝගය නිසා ඇතිවන සංකූලතාවල ස්වාභාවය අනුව කාණ්ඩ කිරීමකට ලක්කරයි.එහිදී ,අපට කාණ්ඩ තුනක් (03) හදුනාගත හැකිය.

• පලමු කාණ්ඩය
 
රෝගීන්ගේ රුධිරගත ග්ලූකෝස් ප්‍රමාණය ආහාර පාලනයෙන් පමණක් රෝගය පාලනය කළ හැකි රෝගීන්.

• දෙවනි කාණ්ඩය

රෝගීන්ගේ රුධිරගත ග්ලූකෝස් ප්‍රමාණය ආහාර හා ව්‍යායාම යන දෙකෙන්ම රෝගය පාලනය කල හැකි රෝගීන්.

• තෙවන කාණ්ඩය

ආහාර,ව්‍යායාම මෙන්ම ඖෂධ යන අවස්ථා තුනම භාවිතා කර රුධිර ගත ග්ලූකෝස් ප්‍රමාණය පාලනය කල හැකි රෝගීන්.

මධුමේහය තත්වය සදහා ආයුර්වේද වෛද්‍ය විද්‍යාවේදී මුලින්ම ප්‍රථිකාර කරන්නේ රෝග මූලයට වේ.එනම්,නිසි කළමණාකාරී බවකින් යුතු සෞඛ්‍යසම්පන්න ජීවන රටාවක් ඇතිකිරීමට අවශ්‍ය උපදෙස් ලබාදේ.

ආයුර්වේද වෛද්‍ය විද්‍යාවේදී මධුමේහය පාලනය සදහා ලබාදෙන උපදෙස් හා ඒවායේ විද්‍යාත්මක පසුබිම පිළිබඳව සලකාබලමු .

• නිවැරදි ආහාර භාවිතය හා ප්‍රමාණවත් ලෙසට ආහාර ගැනීම හෙවත් අධිපාරිභෝජනයෙන් තොරවීම.

• දිනපතා විනාඩි 30 - 40 ක් පමණ ව්‍යායාම වල නිරතවීම.

• මානසික ආතතියෙන් මිදීම සදහා යෝග ව්‍යායාම,මෘදු සංගීතයට සවන්දීම,භාවනා කිරීම,මාළු ටැංකියක් දෙස බලාසිටීම වැනි ක්‍රියාකාරකම් වල නියැලිම.

මධුමේහය සදහා ආයුර්වේද වෛද්‍ය විද්‍යාවේදී නිවැරදි ආහාර රටාවකට හුරුවීම ප්‍රමුඛ කාර්‍යක් ලෙසට උගන්වයි.මෙහිදී නිවැරදි ආහාර රටාවකට හුරුවීම සදහා රෝගියාට පහත සදහන් උපදෙස් ලබාදීම සිදුවේ .

• මුලින්ම රෝගියාගේ බලය / ශක්තිය වැඩිකරන ආහාර ලබාදිය යුතුය .

මේ සදහා සහල් , තිරිඟු , තණහාල්, කුරක්කන් , මෙනේරි හා බාර්ලි යන ධාන්‍ය වර්ග යොදාගත හැකිය.

කුරක්කන් මධුමේහ රෝගීන් සදහා ගුණාත්මක බවින් වැඩි ආහාරයක් වේ.එමගින් තරබාරුව පාලනය කරන අතර ඉන්සියුලින් ශරීරය තුළ නිපදවීම සදහා අවශ්‍ය සංඝටක බහුල ලෙසට පවතී .ඒකාකාරි බවින් යුතුව කුරක්කන් ආහාර අනුභවය රෝගියා ප්‍රථික්ෂේප කරන්නේ නම් ,කුරක්කන් අඩංගු විවිධ ආහාර පිළියෙල කළ හැකිය .(කුරක්කන් තලප ,කුරක්කන් පිට්ටු,කුරක්කන් කැද ,කුරක්කන් ඉදිආප්ප..........)

• නිවුඩ්ඩ සහිත ආහාර අනුභවය වඩාත් සුදුසු වේ.

විශේෂයෙන්ම නිවුඩ්ඩ සහිත ආහාර වර්ග අතුරින් රතු නිවුඩ්ඩ සහිත තැම්බූ සහල් වර්ග ආහාරයට ගැනීම සුදුසු වේ.

• උදෑසන ආහාරය සදහා හීල්බත්,දියබත් හා සුණුසහල් බත් අනුභවයට ගැනීම සුදුසු වේ.

• පැල කරගත් මුංඇට ආහාරයට ගැනීම මධුමේහය සදහා යෝග්‍ය වේ.

• හැකිතාක් දුරට ස්වාභාවික එළවළු වර්ග අමුවෙන් අනුභව කල යුතුය .

මේ සදහා ගොටුකොළ සලාද හා ගොටුකොළ යුෂ.කතුරුමුරුංගා සලාද හා කතුරුමුරුංගා යුෂ,පිපිඤඤා සලාද හා පිපිඤඤා යුෂ සුදුසු වේ.මේවා හැකිතාක් දුරට අමුවෙන් අනුභවය උචිත වේ.

• ඝෘජු ලෙසටම මධුමේහය සදහා සුදුසු එළවළුවක් ලෙසට කරවිල නිර්දේශ කළ හැකිය.මෙයත් හැකිතාක් අමුවෙන් සලාද වශයෙන් අනුභවය ඉතාමත් යහපත් වේ.

කරවිල තුළ ශාක ඉන්සියුලින් අඩංගු වේ.එමගින් මධුමේහය විශාල වශයෙන් පාලකයක් සිදුකරයි.

• කරපිංචා,සුදුළූණු,රතුළූණු ද මධුමේහ රෝගීන් සදහා ගුණදායක වේ.

• මධුමේහය රෝගීන් සදහා ගුණදායක පළතුරු වර්ගයන් ලෙසට වෙරළු ,පේර,අත්තික්කා,දෙළුම් ,අන්නාසි, කාමරංකා ද පැගිරි කුලයේ පළතුරු ලෙසට දෙහි,දොඩම්,ජම්බෝල,ගස්ලබු ,නාරං, අන්නාසි, මාදං වැනි පලතුරු ගුණාංගය වේ.

මේවා බොහෝමයක් තන්තු සහිත පළතුරු වර්ගයන් වේ.එමගින් මධුමේහය පාලනයට දායක වේ.

කාබෝහයිඩ්‍රේට් අඩංගු අප ලබාගන්නා ආහාර වල අවසාන ඵලය බොහෝ අවස්ථා වලදී වන්නේ ග්ලූකෝස් වේ.මධුමේහය සදහා ප්‍රධාන හේතුව වන්නේ මෙම රුධිරගත ග්ලූකෝස් ප්‍රමාණය නිසි ආකාරයෙන් පාලනය කරගත නොහැකි වීමයි.එහිදි ,ආහාරය මගින් රුධිරගත වන ග්ලූකෝස් ප්‍රමාණය පාලනය කරගන්නේ නම් මධුමේහය නිසි ආකාරයෙන් පාලනය කරගත හැකිය.

කාබෝහයිඩ්‍රේට් ආහාර අප සාමාන්‍යයෙන් බහුල වශයෙන් ආහාරය සදහා ලබාගන්නේ පිෂ්ඨ ආහාර ස්වරූපයෙනි. ආයුර්වේද වෛද්‍ය විද්‍යාවට අනුව පිෂ්ඨ ආහාර වර්ග දෙකකට වෙන්කරයි.

• සරල කාබෝහයිඩ්‍රේට ආහාර

මේවා ආහාරයට ගැනීම මගින් ඉක්මනින් ජීරණයට ලක්වී ඉක්මනින් විශාල ග්ලුකෝස් ප්‍රමාණයක් රුධිරය වෙතට යොමු කරයි .රෝගියාගේ නිසි ඉන්සියුලින් හෝමෝන ප්‍රමාණයක් නොවු කළ මෙසේ වූ විට ක්ෂණිකව රුධිර ග්ලූකෝස් මට්ටම ඉහල ගොස් මධුමේහය තත්වය උත්සන්න වේ.

ක්ෂණික ආහාර සහ ටොෆී , චොකලට් , හකුරු, සීනි වැනි ආහාර වර්ග මෙම සරල කාබෝහයිඩ්‍රේට ආහාර ලෙසට හැදින්විය හැකිය.

• සංයුක්ත කාබෝහයිඩ්‍රේට ආහාර

මේවා ආහාරයට ගැනීම මගින් ඉක්මනින් ජීරණයට ලක් නොවේ.එහිදී රුධිරයට ක්ෂණිකව එකතු වන ග්ලූකෝස් ප්‍රමාණය අවම අගයක් ගනී.එමනිසා අඩු ඉන්සියුලින් ප්‍රමාණයකදි වුවත් රුධිරයේ ග්ලූකෝස් ප්‍රමාණය නිසි ආකාරයකට පාලනය වීමක් සිදුවේ.එමනිසා මධුමේහය තත්වයක් ඇතිනොවීම හෝ පවතින මධුමේහ තත්වය පාලනය වීමක් මනාලෙසට සිදුවේ.

ආයුර්වේද වෛද්‍ය විද්‍යාවේදී අනුමත කරන්නේ මෙවැනි සංයුක්ත කාබෝහයිඩ්‍රේට අඩංගු ආහාරයන් වේ.මේවා ලෙසට,

1. නිව්ඩු සහලේ බත්
2. කුරක්කන්
3. තණහාල්
4. පැරණි සහල් වර්ග
5. තන්තු බහුල එළවළු හා පළතුරු වර්ග (ඉහතින් දක්වා ඇත.)
දැක්විය හැකිය.

මීට අමතරව ආයුර්වේද වෛද්‍ය විද්‍යාව තුළ මධුමේහය සදහා ප්‍රත්‍යක්ෂ වූ ඖෂධ පෙළක් පවතී .නෙල්ලි,කොහොඹ,කොතල හිඹුටු,කහ වැනි ඖෂධීය ශාක වලින් සාදන ක්ෂාය, කල්ක, චූර්ණ, ගුලි , තෛල ආදිය ඖෂධ වශයෙන් භාවිතා කරයි.

මූලික වශයෙන් අවශ්‍ය වන්නේ තම එදිනෙදා ජීවිතය මනාකළමණාකාරීත්වයෙන් යුතුව පවත්වාගැනීමයි.එය තුළින් ඔබට වුවත් ඖෂධ වලින් තොරව නීරෝගී ජීවිතයක් ගතකළ හැකිය.

D.H.S.L

Facebook ඔස්සේ " දිනපොත - Dairy " පිටුව සමග ඔබට මෙතනින් එකතු විය හැකිය.
නව ලිපි ඔබට එමගින් පහසුවෙන් කියවීමට අවස්ථාව උදාකර ඇත.

හෘදයාබාධ වලට ගුණදායක " ඇඹරැල්ලා " පිළිබඳව ආයුර්වේද මතය.

සාමාන්‍ය ජීවිතයේදී බටහිර වෛද්‍ය විද්‍යාත්මක සංකල්ප වලින් බැහැරව ආයුර්වේද වෛද්‍ය විද්‍යාව පිළිබඳව පිළිබඳව කරුණු දැක්වීම මෙම ලිපියේ අරමුණ වේ.

සාමාන්‍ය ගෘහාශ්‍රිත ජීවිතයේදී පරිහරණය කරන "ඇඹරැල්ලා" ශාඛයේ ආයුර්වේද වෛද්‍ය විද්‍යාත්මක වැදගත්කම පිළිබඳව හදාරමු.

"ඇඹරැල්ලා"යනු,එළවළුවක් ලෙසට ව්‍යාංජන වලටත්,පළතුරක් ලෙසට අමුවෙන් හෝ ඉදීමෙන් වුවත් අනුභව කල හැකි ශාඛයකි.මෙය ඉතා ඖෂධීය ශාඛයක් වේ.

මුලින්ම "ඇඹරැල්ලා" ශාඛයේ නාමය ව්‍යවහාර වූ ආකාරය පිළිබඳව හදුනාගනිමු.

ඇඹරැල්ලා සංස්කෘත භාෂාවේ "අභ්‍රාප්‍රස" සහ "අද්වභෝගය" යන නම්වලින් හදුන්වයි.මෙම සංස්කෘත භාෂාවේ "අද්වභෝගය" ලෙසට හදුන්වන්නේ "පයින් ගමන් කරන්නාගේ ආහාරය යන්නයි".එනම්,අතීතයේදී පයින් දුර ගමන් යනවිට දී ආහාරයක් වශයෙන් විනෝදකාමී ලෙසට ඇඹරැල්ලා ආහාරයට ගත්බව පැවසේ.

අතීත ලංකාවේ ගම්පහ දිස්ත්‍රික්කයේ ආසන්නව පැවති "ඇඹරළුව" ගම්මානයේ අධික වශයෙන් විශාල අස්වැන්නක් සෑදුනු ශාඛයක ගෙඩි වර්ගයක් "ඇඹරැලු" ලෙසට හදුන්වන ලදී.මෙය ව්‍යවහාරයේදී පසු කාලීනව ඇඹරැල්ලා ලෙසට හදුන්වන ලදී.

ඇඹරැල්ලා වල උද්භිත විද්‍යාත්මක නාමය Spondias dulcis ලෙසට හදුන්වයි.

ඇඹරැල්ලා ඵලය(ගෙඩිය),ඇඹරැල්ලා දළු,ඇඹරැල්ලා ගසේ පොතු මෙන්ම ඇඹරැල්ලා ගසේ මැලියම් ද ආයුර්වේද වෛද්‍ය විද්‍යාවේ ඖෂධ වර්ග සෑදීම සදහා යොදාගනී.

ඇඹරැල්ලා ගෙඩිය ප්‍රධාන වශයෙන් කොටස් දෙකකින් යුක්තය.

• ඇඹරැල්ලා ලෙල්ල හා ඒ අවට මාංසල කොටස.

මෙම කොටස තරමක් ඇඹුල් රසයකින් යුක්ත වේ.

• ඇඹරැල්ලා ඇටය හා ඒ අවට ඇති මාංසල කොටස

මෙය තුළ සාපේක්ෂව ඇඹුල් රස අඩුය.

ඇඹරැල්ලා ගසේ දළු මගින් යුෂ ලබාගැනීමක් ,ඇඹරැල්ලා ගෙඩි වල පොතු මගින් ක්ෂාය සෑදීමක් ද සිදුකර විවිධ රෝගාබාධ සදහා භාවිතා කරයි.ඇඹරැල්ලා ගසේ මැලියම් දුම්ගැසීම මගින් විවිධ රෝග සදහා ප්‍රතිකාර වශයෙන් යොදාගනී .

ඇඹරැල්ලා වල මාංසලමය කොටස ආහාර නොදිරවීම හා ආහාර නොපැසීම හේතුවෙන් ඇතිවන උදරාබාධ තත්වයන් සදහා ප්‍රත්‍යක්ෂ ඖෂධයක් වේ.

අමු ඇඹරැල්ලා ගෙඩි තරමක ඇඹුල් රසයකින් හා කසට රසයකින් යුක්ත වන අතර ඉදුණු ගෙඩි මිහිරි කසට රසයකින් යුක්ත වේ.අමු හා ඉදුණු ඇඹරැල්ලා ගෙඩි වල ඖෂධීය ගුණය එකිනෙකට වෙනස් නිසා ඒවා විවිධ රෝග සදහා ඖෂධ වශයෙන් යොදාගනී.

අමු ඇඹරැල්ලා උෂ්ණ ගුණයකින් යුක්ත වන අතර ඉදුණු ඇඹරැල්ලා සීත ගුණයකින් යුක්ත වේ.එමනිසා ,උෂ්ණාධික රෝග බහුලව පවතින පුද්ගලයින් අමු ඇඹරැල්ලා අනුභවය පිළිබඳව සැලකිලිමත් විය යුතුය .

ඉදුණු ඇඹරැල්ලා ආහාරයට ගැනීම මගින් වාතදෝෂ,පිත්ත දෝෂ හා රක්ත දෝෂ වලින් ඇතිවන රෝගාබාධ වලින් සුවවිය හැකිය .පිත්ත දෝෂය මගින් විවිධ අජීර්ණ තත්වයන් ඇතිවේ,ඒවා සුවකිරීම සදහා මෙම ඉදුණු ඇඹරැල්ලා යොදා ගත හැකිය .

විටමින් ඌනතාවය හේතුවෙන් සෑදෙන සමහර රෝග සදහා හොදම විටමින් අඩංගු ආහාරයක් ලෙසට ඇඹරැල්ලා යොදාගත හැකිය .

ඇඹරැල්ලා ශාඛය සතුව විෂනාශක ගුණයක් ඇත.විශේෂයෙන්ම බටහිර වෛද්‍ය ශිල්ප නොපැවති අතීතයේදී සිදුවූ යුධගැටුම් වලදී ඊතල ඇනීමෙන් ඇතිවූ තුවාල සුවකර ගැනීම සදහා ඇඹරැල්ලා ගෙඩි භාවිතා කරන ලදී.

හෘදරෝගීන් සදහා ,මෙන්ම හෘදයාබාධ ඇතිවීම වැලැක්වීම සදහා ද ඇඹරැල්ලා ආහාරයට ගැනීම හිතකර වේ.

කුෂ්ඨ රෝග ආදී සමේ රෝග වැලදුනු විට අමු ඇඹරැල්ලා නුසුදුසු අතර ඉදුණු ඇඹරැල්ලා ආහාරය සදහා ප්‍රත්‍යක්ෂ වේ.ඊට හේතුව වන්නේ බොහෝ සමේ රෝග යනු උෂ්ණාධික රෝග වන බැවිනි.

ඉදුණු ඇඹරැල්ලා ගෙඩි ශරීරය දුර්වල කෙනෙකු සදහා සුදුසු වේ .එමගින් බලය වර්ධනය හා ශරීරය පෘෂ්ටිමත් කිරීම සිදුකරවයි.කාම ශක්තිය වර්ධනය සදහා ද ඉදුණු ඇඹරැල්ලා සුදුසු ඖෂධීය ආහාරයක් වේ.

ගැස්ට්‍රයිටිස් රෝගය හෙවත් අම්ල පිත්ත රෝගයේදී ඇඹරැල්ලා පොතු මගින් ක්ෂාය කර පානය කිරීම සුදුසු වේ.කක්කල කැස්ස හා දිගු කාලීන කුෂ්ඨ රෝග වලදී පැසුණු ඇඹරැල්ලා ගෙඩියක පොතු ඉවත්කර ගෑරුප්පුවකින් සිදුරු කර මීපැණි වල බහා දිනකට එක බැගින් අනුභවය මගින් එවැනි රෝග සුවකළ හැකිය.

කන් කැක්කුම ඇති අවස්ථා වලදී ඇඹරැල්ලා කොළ වල යුෂ ගෙන කනේ බාහිරින් ආලේප කිරීම කළ හැකිය .අධික රුධිර පීඩනය සදහා ඇඹරැල්ලා දළු ගුණාත්මක ඖෂධයක් වේ.

දියවැඩියාව හෙවත් මධුමේහය රෝගය සදහා ඇඹරැල්ලා ගෙඩි ගුණදායක වන අතර,ඇඹරැල්ලා ගසේ මැලියම් වලින් දුම් ඇල්ලීම මධුමේහ රෝගීන් සදහා යහපත් වේ.

අධික රුධිර පීඩනය සදහා ඇඹරැල්ලා දළු මෙන්ම ඇඹරැල්ලා ගෙඩිද උචිත ඖෂධයක් වේ .

තැල්මක් ඇති අවස්ථාවකදී ඇඹරැල්ලා ගසේ පොතු සූරා එය ලුණු වතුරෙන් අඹරා ගෑම මගින් තැල්ම අඩු වීමක් සිදුවේ.කාන්තාවන්ට ඇතිවන ශ්වේත ප්‍රදරමය තත්වයේදී (යෝනි මාර්ගයෙන් සුදු පැහැති ස්‍රාවයක් නිතර පිටවීම) ඇඹරැල්ලා පොතු මගින් සාදාගන්නා ක්ෂාය පානය කිරීම සුදුසු වේ.

බෙල්ලේ ගණ්ඩමාල අවස්ථාවේදී ඇඹරැල්ලා ගසේ පොතු අරළු හා අමු ඉගුරු සමව ගෙන දෙහි ඇඹුලින් අඹරා එහි යුෂ බෙල්ලේ ආලේප කිරීම මගින් රෝගය සුවවේ.

සෙම තත්වය අධික වී සෙම් ගෙඩි අධික වී උගුර ඉදිමි ඇතිවිට ඇඹරැල්ලා ගසේ පොත්ත ගෙන එහි සුදු පැහැති කොටස සූරා ඉවත් කර එයට ලුණු ,ගම්මිරිස් හා අමු ඉගුරු එකතු කර හොදින් තලා නස් නාරං යුෂයෙන් කකාරවා උගුරේ බාහිරින් ආලේප කරන්න .ප්‍රත්‍යක්ෂ වශයෙන්ම උගුරේ ඉදිමුම් තත්වය සමනය වේ.

මේසා ගුණ ඇති ඇඹරැල්ලා චට්නියක් ලෙස හා අච්චාරුවක් ලෙස ඔබට ආහාරයට ද ගත හැකිය .

••••••••••••••••••••••••••••••••••••

D.H.S.L

Facebook ඔස්සේ නවතම ලිපි පරිශීලනය කිරීම සදහා " දිනපොත - Dairy " පිටුව සමග මෙතනින් එකතු වෙන්න

එකොළොස් වැනි දිගහැරුම (#11)

බෝවන අක්ෂි රෝගය (ඇස් ලෙඩ) සහ ඇස් කැසීම (අක්ෂි ආසාත්මිකතාවයන් )

✻✻✻✻✻✻✻✻✻✻✻✻✻✻✻✻✻

මෙලෙස බෝවන අක්ෂි රෝගයක් සෑදුනු පසුව එමගින් තමන්ට දැනෙන අපහසුතාවය කුඩා වුවත් එය සදහා ඔබ වෛද්‍යවරෙක් හමුවිය යුතුය.ඊට හේතුව වන්නේ ,අක්ෂි ප්‍රදාහය මගින් අතුරු ආබාධ ඇති නොකලත් දීර්ඝකාලීන අක්ෂි රෝගය මගින් ඇසට අතුරු ආබාධ ඇතිකළ හැකිය.

(මෙම මාතෘකාවට අදාළ මුල් කොටස පෙර ලිපිය වූ දසවෙනි ලිපියේ (#10) ඇත.මෙම ලිපිය අවසානයේ එයට අදාල LINK එක ඇත.)

මෙම දීර්ඝකාලීන අක්ෂි රෝගය මගින් සමහර අවස්ථා වලදී අතුරු ආබාධ ඇතිකිරීමට හේතු වන්නේ එම රෝගය සාදන්නේ බැක්ටීරියාවක් (Bacteria ) නිසාය.

බෝවන අක්ෂි ආබාධ (අක්ෂි ප්‍රදාහය හෝ දීර්ඝකාලීන අක්ෂි රෝගය ) මගින් වෛද්‍ය ප්‍රතිකාර නොකිරීමකදී ඇතිවිය හැකි අතුරු ආබාධ පිළිබඳව සලකමු .

1. දීර්ඝකාලීන අක්ෂි රෝගයේ( දීර්ඝකාලීන ඇස් ලෙඩ ) අතුරුප්‍රතිඵලයක් ලෙසට කළුඉංගිරියාව ආශ්‍රිතව සුදු පුල්ලි ඇතිවිය හැකිය.මෙහි ප්‍රතිඵලයක් ලෙසට ඇසේ පෙනීමට බාධා ඇතිවේ.මෙම සුදු පුල්ලි ඉවත් කිරිම සදහා කල්ගත වේ.

2. දීර්ඝකාලීන ඇස් ලෙඩේ තවත් අතුරුප්‍රතිඵලයක් වන්නේ කළුඉංගිරියාව ආශ්‍රිතව කළුළප ඇතිවීමයි.එමගින්ද ඇසේ පෙනීමට බාධා ඇතිකරයි.කල්ගත වී මෙම කළුළප ඉවත් කලත් ඒවා නැවත නැවතත් මතුවිය හැකිය.එමනිසා දීර්ඝකාලීනව ඇස් පෙනීම දෝෂ සහගත වේ.

3. කළුඉංගිරියාව තුවාල වීමක්ද මෙම ඇස් ලෙඩේ අතුරුප්‍රතිඵලයක් ලෙසට සිදුවිය හැකිය.

4. ඇසේ කුනිතය (ස්වච්චය ආශ්‍රිතව ) මත තුවාල ඇතිවීම හෝ එම ඇතිවූ තුවාල වර්ධනයක් වීම.ඇස අන්ධ වීමට ඇති එක්තරා මාර්ගයක් වන්නේ මෙම කුණිතය ආශ්‍රිත තුවාල ඇතිවීමයි.

මෙවැනි අක්ෂි රෝග වලදී වෛද්‍ය නිර්දේෂයකින් තොරව ස්ටෙරොයිඩ අඩංගු ඖෂධ වර්ග නොගත යුතුය .එමගින් ඇසේ පීඩනය ඉහල ගොස් Glucoma රෝගී තත්වයක් බවට මෙය වර්ධනය විය හැකිය.

එක් අවස්ථාවක් මෙවැනි බෝවන අක්ෂි රෝගයක් සෑදුනු පසුව නැවතත් සෑදීමේ ඉඩකඩක් පවතී.

එයට හේතුව වන්නේ මෙවැනි බෝවන අක්ෂි රෝග සෑදීමට එක් ව්‍යාධිජනකයෙකු නොව ව්‍යාධිජනකයින් වර්ග කීපයක් සහභාගී වන බැවිනි.එමනිසා අවශ්‍ය වන්නේ රෝගය සෑදුනු පසු හැකි ඉක්මනින් වෛද්‍ය උපදෙස් පැතීමයි.

බෝවන අක්ෂි රෝගයක් සෑදුනු පසුව පොතපත පරිහරණය පිළිබඳව කෙනෙකු තුළ ගැටළුවක් පවතී.පොතපත පරිහරණය කිරීමේදී අදාල රෝගියාගේ ඇසට වේදනාවක්,අධික ලෙස කබ හෝ කදුළු ගැලීමක් සිදුනොවේනම් පොතපත පරිහරණය කලාට කිසිදු වෛද්‍යමය ගැටළුවක් නැත.

නමුත් ,මෙහිදී පොදු පොත්පත්,පුස්තකාල පරිහරණය සිදුනොකළ යුතුය .එමගින් වන්නේ රෝගය තවදුරටත් ව්‍යාප්ත කිරීමකි.

බෝවන අක්ෂි රෝග සහ බෝනොවන අක්ෂි රෝග වලට අමතරව ඇස ආශ්‍රිතව පවතින තවත් රෝගී තත්වයක් වන්නේ " ඇස කැසීම සමග ඇසෙන් කදුළු ගැලීමයි ".මෙය Allergic Conjuncitivitis තත්වයක් ලෙසට හදුන්වයි.මෙම තත්වය සම්පූර්ණයෙන්ම ඇතිවන්නේ ආසාත්මිකතාවයක්(Allergic) නිසාය.

මෙවැනි ආසාත්මිකතාවයක් නිසා ඇස කැසීම හා ඇසෙන් කදුළු ඒම තත්වයේ සාමාන්‍ය රෝගී ලක්ෂණ පහත පරිදි වේ .

1. ඇස් කැසීම.

2. ඇසෙන් කදුළු ඒම.

3. ඇස කෙවීම.

4. ඇස රතු වීම හා තරමක් ඇස ඉදිමීම.

5. ඇස තරමක් වේදනාකාරී වීම.

6. ආලෝකය දෙසට බැලීමට නොහැකි වීම.

මෙවැනි ආසාත්මිකතාවයන් හා බෝවන අක්ෂි රෝගය සාමාන්‍යයෙන්,වෛද්‍ය පරීක්ෂණයකින් තොරව හදුනාගත හැකි එකිනෙකට වෙනස් වූ රෝග ලක්ෂණ කීපයක් පවතී .

1. බෝවන අක්ෂි රෝගයේ තරම් ඇසේ වේදනාවක් මෙම ආසාත්මිකතාවයන් හිදී ඇතිනොවේ.

2. ඇසේ කහවන් පැහැයට කබ ගැලීමක් මෙම ආසාත්මිකතාවයන්හිදි සිදු නොවන තරම් වේ.(සුළු වශයෙන් විය හැකි වුවත් එය අධික ලෙසට සිදුනොවේ.)

3. ආසාත්මිකතාවයන් හිදී ඇසෙන් කදුළු ගැලීම සාමාන්‍යයෙන් අධිකව සිදුවිය හැකිය.

මෙවැනි ඇසේ ආසාත්මිකතා ඇතිවීම සදහා බලපාන හේතු රාශියක් පවතී.

1. ගෘහාශ්‍රිතව ඇතිකරන සුරතල් සතුන් මගින්

2. සමහර ආහාර මගින් (මෙය පුද්ගලයා මත රදාපවතී.)

3. දුහුවිල්ල මගින් හා විවිධ ආගන්තුක ද්‍රව්‍ය මගින් (මල් පරාග,දුම්,පුළුන් ආදිය )

4. අක්ෂි ආබාධ සදහා ඇසට යොදන සිවි කාච මගින්

5. අනවශ්‍ය ලෙසට භාවිතා කරන සුවද විලවුන්,රූපලාවණ්‍ය ද්‍රව්‍ය හා සමට භාවිතා කරන සමහර ඖෂධ වර්ග

ඇදුම ,එක්සීමා වැනි රෝගීන් හට මෙවැනි ඇසේ ආසාත්මිකතා සෑදීමේ වැඩි සම්භාවිතාවයක් පවතී.එමනිසා ඔවුන් පෙර කී ඇසේ ආසාත්මිකතාවයන් ඇතිකරන හේතු වලින් හැකිතාක් වැලකිය යුතුය .

මෙවැනි ඇසේ ඇතිවන ආසාත්මිකතාවයන්ගෙන් වැලකිය හැකි ඖෂධ වලට වඩා ඇති හොදම ක්‍රමය වන්නේ රෝගය ඇතිවන හේතු පිළිබඳව ඇති දැනුවත්භාවයයි.

එහිදී පහත ක්‍රියාකාරකම් සිදුකිරීම මගින් මෙවැනි අක්ෂි ආසාත්මිකතාවයන් වලින් වැලැක්විය හැකිය.

• ගෘහාශ්‍රිතව ඇතිකරන බළලුන් , අධික ලෝම සහිත සුනඛයන් නිවස ඇතුලත පවතින ඇදන් මතට,පුටු මතට පැමිණීම වැලැක්වීම.මෙවැනි රෝගී පුද්ගලයින් හැකිතාක් දුරට ඉහත කී ලෝම අධික සතුන් සුරතල් කිරීමෙන් වැලකීම.

• වැඩි වශයෙන් මෙවැනි රෝගීන් ගැවසෙන නිවස ඇතුල,සේවා ස්ථාන හැකිතාක් දුරට දුහුවිලි වලින් තොරව පිරිසිදුව පවත්වා ගැනීම.

• පරාග ,පුළුන් ,දුම වැනි දේවල් වලින් බොහෝ දුරට ඈත්ව වාසය කිරීම .

• විවිධ අක්ෂි ආබාධ සදහා ඇසට යොදන සිවිකාච වල ප්‍රමිතිය පිළිබඳව සැලකිලිමත් විම.

• සුවද විලවුන් සහ රූපලාවණ්‍ය ද්‍රව්‍ය භාවිතයට පෙර තමන්ගේ ශරීරයට ආසාත්මිකතාවයන් ඇති නොකරන්නේ දැයි සුළු පරීක්ෂණයක් සිදුකිරීම .

බොහෝ දුරට පාසල් ළමුන් අතර මෙම අක්ෂි ආසාත්මිකතාවයන් බහුලව පවතී .එයට ප්‍රධානතම හේතුව වන්නේ ,වැඩිහිටියන්ට වඩා ඔවුන් ක්‍රියාශීලී සහ ක්‍රීඩාසම්පන්න වීම නිසා ඔවුන් බාහිර විවෘත පරිසරය සමග ගැටෙන සම්භාවිතාවය වැඩි වීමයි.

ඉතිරිය ඊලඟ ලිපියෙන්  ❃❃❃❃❃❃❃❃❃❃❃❃

D.H.S.L

දසවෙනි ලිපිය (#10) මෙතනින් බලන්න .

Facebook ඔස්සේ නව ලිපි පරිශීලනය සදහා "දිනපොත - Dairy" පිටුව සමග මෙතනින් සම්බන්ධ වන්න.

දසවැනි දිගහැරුම (#10)

බෝවන අක්ෂි රෝගය ( ඇස් ලෙඩ )
❆❆❆❆❆❆❆❆❆❆❆❆❆❆❆❆

සාමාන්‍යයෙන් උෂ්ණත්වය අධික කාලවලදී කෙටි කාළයක් තුළ වසංගතයක් ලෙසට බොහෝ පිරිසක් අතර බෝ වන අක්ෂි රෝගයක් පැතිරි යයි.ජනාකීර්ණ ප්‍රදේශ වල මෙය බහුලව පැතිරී යයි.

බෝවන අක්ෂි රෝග සෑදීම සදහා එක් ව්‍යාධිජනකයින් පිරිසක් සහභාගි වේ යයි නිශ්චිතවම කිවනොහැක.විවිධ කාළයන් හා විවිධ දේශගුණික තත්ව හා විවිධ පුද්ගලයින්ගේ ප්‍රතිශක්තිය මත මෙම රෝගය ව්‍යාප්තවීම තීරණය වේ.

මෙම බෝවන අක්ෂි රෝග සෑදීම සදහා බැක්ටීරියා ,වෛරස,දිලීර ආදි ව්‍යාධිජනකයින් සහභාගී විය හැකිය .මින්,අක්ෂි ප්‍රදාහය (Conjunctivities) යනු ,එක්තරා බෝවන අක්ෂි රෝගයක් වේ.එය ඇතිවන්නේ වෛරස(Virus) මගිනි.

බෝවන අක්ෂි රෝගයක් යනු,ස්ඵර්ශයෙන් එක් අයෙකුගෙන් තවත් අයෙකුට පැතිරෙන විවිධ ව්‍යාධිජනකයින් මගින් සෑදෙන සාමාන්‍යයෙන් සති දෙකක පමණ (විචලනය විය හැකිය ) රෝගී කාලයකින් යුතු සුවිශේෂි වූ රෝගි ලක්ෂණ දරන රෝගී තත්වයක් වේ.

මෙම ලිපියේ මුල් කොටස නවවෙනි ලිපියේ (#09) ඇත.එය අවශ්‍ය නම්  මෙතනින් බලන්න 

මෙම බෝ වන අක්ෂි රෝග පුද්ගලයින් හට සෑදිමේ සුලහතාවය මත ආකාර දෙකකට (02) වෙන්කර දැක්විය හැකිය.

1. දීර්ඝකාලීනව පවතින ඇස් ලෙඩ

2. අක්ෂි ප්‍රදාහය (Conjunctivities )

මෙම දීර්ඝකාලීන ඇස් ලෙඩ සෑදෙන්නේ බැක්ටීරියාවක් මගිනි.සාමාන්‍යයෙන් සති දෙකක පමණ දීර්ඝ කාලයක් මෙම රෝගය පවතී.ස්ඵර්ශය මගින් මෙය ව්‍යාප්ත වීම සිදුවේ.එක් ඇසකට රෝගය සෑදුනු පසුව තවත් ඇසකට මෙම රෝගය ව්‍යාප්ත වීමේ ඉහල සම්භාවිතාවයක් පවති.නමුත් ,නිවැරදි සනීපාරක්ෂක ක්‍රම අනුගමනය කරන්නේ නම් ,මෙය ව්‍යාප්ත වීම අවම වේ.

දීර්ඝකාලීන ඇස් ලෙඩ මගින් ඇතිවන රෝගී ලක්ෂණ මෙසේ දැක්විය හැකිය.

1. ඇස් දැවිල්ල

2. ඇස් වටේ ඉදිමුම් ස්වරූපයක් ගැනිම

3. ඇස් වලින් අධික ලෙස කබ ගැලීම

4. උණ සහ උගුරේ වේදනාව

5. ඉර දෙස බැලීම අපහසු විම

6. ඇස් වලට වැලි වැටුනා සේ ඇස කෙවීමට ලක්වීම

7. ඇස් වලින් කදුළු ගැලීම 

බෝවන තවත් අක්ෂි රෝගයක් වූ අක්ෂි ප්‍රදාහය (Conjunctivities) සෑදෙන්නේ වෛරසයක් මගින් වේ.මුලින් කථා කල දීර්ඝකාලීන ඇස් ලෙඩ මෙන් සතිදෙකක කාලයක් ලෙඩ ඇතිනොකරයි.සාමාන්‍යයෙන් දින 03-04 ක කාලයක් මෙම රෝගී තත්වය පවතී.

මෙම අක්ෂි ප්‍රදාහයේ රෝගී ලක්ෂණ වන්නේ පෙර කියූ දීර්ඝකාලීන ඇස් ලෙඩේ ලක්ෂණම වන අතර වෛද්‍ය පරික්ෂණයකින් තොරව මෙම රෝග දෙක වෙන්කර හදුනාගත හැකි වෙනස්කම වන්නේ අක්ෂි ප්‍රදාහයේදි අධික ලෙසට කබ ගැලීමක් දීර්ඝකාලීන ඇස් ලෙඩේදී මෙන් සිදු නොවීමයි.

සාමාන්‍යයෙන් වෙනත් විවිධ හේතූන් මගින් ඇස රතු වීමක් සිදුවෙනවා.එවැනි අවස්ථා බෝවන අක්ෂි රෝගයක් නොවන නමුත් ,ඇස රතුවිය හැකි හේතූන් සලකමු .

1. ඇසට විවිධ ආගන්තුක ද්‍රව්‍ය ඇතුළු වීම.(වැලි,විවිධ සතුන්,කොළරොඩු)

2. විවිධ රසායනික ද්‍රව්‍ය ඇසට වැටීම.

3. ඇසට පහරක් එල්ල වීම මගින් අනතුරක් සිදුවීම.

4. ආහාර මගින් විවිධ ආසාත්මිකතාවයන් මතුවීම.

5. වෛද්‍ය නිර්දේෂයකින් තොරව සිවි කාච භාවිතා කිරීම.

6. වියපත් වීම සමග ඇසේ කදුළු ඝ්‍රාවය අවම විම නිසා ඇස වියලීමට ලක්වීම.

මෙවැනි අවස්ථා නිසා සාමාන්‍යයෙන් ඇස රතු විය හැකිය.නමුත් මෙවැනි ඇසේ රතුවීමක් පැය 24 කට වඩා පවති නම් එය බෝවන අක්ෂි රෝගයක් යැයි පෙර නිගමනයකට පැමිණිය හැකිය,එහිදී වෛද්‍ය උපදෙස් ලබාගැනීම උචිත වේ.

සියළුම බෝවන අක්ෂි රෝග ව්‍යාප්ත වන්නේ ස්ඵර්ශය මගින් නිසා නිවැරදි හා යහපත් සෞඛ්‍ය වත්පිළිවෙත් පුරුදු වීම මගින් වසංගතයක් ලෙසට මෙම රෝග බෝවීම පාලනය කරගත හැකිය.එලෙස පුරුදු විය යුතු සෞඛ්‍යමත් පුරුදු පහත පරිදි වේ .

1. බෝවන අක්ෂි රෝගයක් සෑදුනු සැණින් ඒ සදහා නිසි වෛද්‍ය ප්‍රතිකාර ලබාගන්න.කල්ගත වීම මගින් තම ශරීරයේ ප්‍රතිශක්තීකරණ හා ව්‍යාධිජනක ප්‍රබලතාවය මත රෝගයේ වෙනත් අතුරු ප්‍රතිඵල පැවතිය හැකි නිසා.

2. රෝගය සුවවන තෙක් පොදු ස්ථාන වල ගැවසිම,පොදු ප්‍රවාහන භාවිතය වැනි කටයුතු හැකිතාක් අවම කරන්න .රෝග සුව වීමට ගතවන්නේ සති දෙකක පමණ කාලයක් නිසා එය අපහසු නොවේ.

3. අයෙකුගෙන් තවත් අයෙකුට බොහෝ අවස්ථා වලදී බෝවන්නේ ස්ඵර්ශය මගින් නිසා සෑම විටම තමන්ගේ දෑත් පිරිසිදුව තබාගන්න.මෙවැනි වසංගත කාලවලදි ඔබ රෝගියෙකු නොවූවත් ඔබ විසින් තමන්ගේ දෑස් ඇල්ලීමට ප්‍රථම දෑත් සෝදාගන්න.

4. ඇස් වලින් කබ හෝ කදුළු ගැලීමකදී ඒවා පිසදැමීමට ලේන්සු හෝ ටිෂූ භාවිතා කරන්න,දෑත් මගින් ඒවා පිසදැමීමට නොයන්න.පසුව එවැනි ලේන්සු හෝ ටිෂූ විනාශ කර දමන්න .

5. සෑමවිටම දෑස අසල පිරිසිදුව තබාගන්න .මැස්සන්,කෝදුරුවන් වැනි සතුන්ට ඇස් මතට වැසීමට ඉඩ නොතබන්න ,ඔවුන් ඇස් ලෙඩ ව්‍යාප්ත කරන හොද වාහක විශේෂයකි.

6. පොදුවේ ඇදන්,කොට්ට උර,තුවායන්,ලේන්සු භාවිතා නොකරන්න,සිප වැලදගැනීමෙන් ද වළකින්න.

7. පිහිනුම් තටාක වල නෑම සුදුසු නොවේ.එමගින් රෝගය ව්‍යාප්ත වීම ඉක්මන් වේ.

මෙවැනි බෝවන අක්ෂි රෝග පිළිබඳව සමාජයේ විවිධ වැරදි මතවාද නිර්මාණය වී ඇත.ඒ පිළිබඳව මදක් සාකච්ඡා කර බලමු.

• අක්ෂි රෝග සෑදුනු පසුව ආහාර තෝරාගැනීමේදි ප්‍රවේශම් විය යුතු බව.

එය සාවද්‍ය කරුණකි.වෙනදා ගත් පුරුදු ආකාරයට සමබල ආහාර වේලක් ගැනීම ප්‍රමාණවත් වේ .ආහාර තේරීමක් කළයුතු නැත.

• මෙවැනි බෝවන අක්ෂි රෝගයක් සෑදුනු පසුව නෑම අහිතකර බව.

අසත්‍යය කරුණකි.මක්නිසාදයත් ,ඇස් වල පිරිසිදු බව මෙහිදී අත්‍යාවශ්‍ය කරුණකි.වෙනත් රෝග තමන්ට නොපවතීනම් ,මෙම රෝගයේදී දිනපතා වුවත් නෑම සුදුසු වේ.

• නිසි වෛද්‍ය උපදෙස් වලින් තොරව සාමාන්‍ය අත් බෙහෙත් රෝගය සදහා භාවිතා කිරීම.

එය නුසුදුසු ක්‍රියාවක් වේ.නිවසේදී මද රස්නයක් ඇති උණු වතුරෙන් හෝ ඇල් වතුරෙන් රෝගී ඇස සේදීම සුදුසු වන අතර වැඩිදුර ප්‍රතිකාර සදහා වෛද්‍යවරයෙක් හමුවට ඉදිරිපත් විය යුතුය .(බටහිර වෛද්‍ය ක්‍රමය තුළ මෙන්ම ආයුර්වේද වෛද්‍ය ක්‍රමය තුළද මෙම රෝග වලට සුදුසු ,ප්‍රත්‍යක්ෂ ඖෂධ රාශියක් පවතී.)

අක්ෂි ප්‍රදාහය (Conjunctivities) වැනි වෛරස (Virus) මගින් සෑදෙන ඇස්ලෙඩ සාමාන්‍යයෙන් අතුරු ආබාධ ඇති නොකරත් දීර්ඝකාලීන අක්ෂි රෝගය බැක්ටීරියාවක් මගින් ඇති කරන නිසා එම රෝගය මගින් රෝගයට නිසි වෛද්‍ය ප්‍රතිකාර සිදුනොකලහොත් අතුරු ආබාධ ඇති කල හැකිය.


ඊලඟ ලිපියෙන් නැවත හමුවෙමු

D.H.S.L

❃❃❃❃❃❃❃❃❃❃❃❃❃❃❃

Facebook ඔස්සේ නවතම ලිපි පරිශීලනය කිරීම සදහා " දිනපොත - Dairy " පිටුව සමග මෙතනින් එකතු වෙන්න.

නවවැනි දිගහැරුම (#9)

ග්ලූකෝමා රෝගය සහ අක්ෂි ප්‍රදාහය (Conjunctivities)

ග්ලූකෝමා රෝගය පිළිබඳව දෙවෙනි ලිපිය මෙයයි.එහි පළමු ලිපිය අටවෙනි දිගහැරුම (#8) තුළ අන්තර්ගත වේ.

එය අවශ්‍ය නම් මෙතනින් බලන්න .

එහිදී සාකච්ඡා කළ ආකාරයට ග්ලූකෝමා රෝගයේ Open angle තත්වය බොහෝ විට වයස අවුරුදු 40 - 50 ඉක්මවූ අයට සෑදුනත් සමහර අවස්ථා වලදී මෙම රෝගය කුඩා දරුවන්ට වැලදිය හැකිය .නමුත් ,කුඩා දරුවන්ගේ අක්ෂි පටල මෘදු නිසා ඒවා මෙම තරලය මගින් ලබාදෙන පීඩනය හමුවේ තරමක් ඇදීමකට ලක්වීම නිසා නියුරෝන සෛල තෙරපී විනාශ වීමකට ලක්නොවේ.

ඉහත රූපසටහනේ දැක්වෙන්නේ කුඩා දරුවෙකුට ග්ලූකෝමා රෝගය සෑදුනු අවස්ථාවකි.

කුඩා දරුවන්ගේ සෑදෙන ග්ලූකෝමා රෝගයේ Open angle තත්වය හදුනාගැනීම වැඩිහිටි අයට වඩා පහසු වේ.ඔවුන්ගේ කළු ඉංගිරියාව (කණිනිකාව ,තාරාමණ්ඩලය ) සුදු පැහැගැන්වී ඇත.එය ඔබ වැඩිහිටියෙකු ලෙස හදුනාගත් වහාම ඔබේ දරුවා වෛද්‍යවරෙක් වෙතට ගෙනයන්න.ඖෂධ ප්‍රතිකාර ක්‍රම මගින් මෙම තත්වය එහිදී පාලනය කරනු ඇත.

ග්ලූකෝමා රෝගයේ දෙවන තත්වය වන Closed angle අවස්ථාව පිලිබදව සලකා බලමු .

එම තත්වය ක්ෂණිකව ඇතිවන රෝගියාට රෝග ලක්ෂණ හදුනාගත හැකි ග්ලූකෝමා රෝගයේ එක්තරා ආකාර තත්වයකි.මුලින් සාකච්ඡා කල Open angle තත්වය මෙන් නොව සාපේක්ෂව සුළු පිරිසක් මෙහි රෝගීන් වේ.

Closed angle ග්ලූකෝමා රෝගයේ රෝගී ලක්ෂණ ÷

1. ඇසේ වේදනාව.(අධිකවම)

2. ඇස ක්ෂණිකවම රතු පැහැ වීම.

3. ඇසේ බබා (කණිනිකාව) ගෝලාකාර ලෙසට විශාල වීම.

4. සමහර පුද්ගලයින්ගේ ඇසේ බබා (කණිනිකාව) ගෝලාකාර නොව ඕවලාකාර හැඩයක් ගැනීම.

5. ඕක්කාරය හා ක්ලාන්තය ඇතිවීම.

ග්ලූකෝමා රෝගයේ Open angle හා Closed angle රෝගී තත්ව ඇති කිරීමට හේතු සාධක සලකාබලමු.

1. උපතේදී ඇතිවන ග්ලූකෝමා තත්වයන්

2. දීර්ඝ කාලීන අධික රුධිර පීඩනය

3. දීර්ඝ කාලීන හා ඉහල අගයකින් යුතු දියවැඩියා තත්වයන්

4. පාරම්පරික ප්‍රවේණික තත්වයන්

5. වියපත් වීම (වයස අවුරුදු 40 ට වැඩි නම් )

6. ඇසට සිදුවන හදිසි අනතුරු තත්වයන්

7. දෘෂ්ටික පේශීන් වයසට යෑම සමග දුර්වල විම

8. අධික ස්ථූලබව හා ඉරුවාරදය වැනි රෝගී තත්වයන්

9. ස්ටෙරොයිඩ අඩංගු ඖෂධ වර්ග දීර්ඝකාලීන භාවිතය

මෙම රෝගයේ අවධානම් තත්වය සලකන්නේ නම් ,රෝගය මූලික අවස්ථාවේදි හදුනානොගෙන අවසාන අවස්ථාව දක්වා කල්ගතවුවොත් අන්ධ විම් වලට ගොදුරු විය හැකිය.

ලෝකයේ දැනට ග්ලූකෝමා රෝගයෙන් පෙළෙන රෝගින් ප්‍රමාණය මිලියන 4.5 ඉක්මවා ගොස් ඇත.ශ්‍රි ලංකාවේ ග්ලූකෝමා රෝගය හදුනාගන්නා රෝගින්ගෙන් 12% ක් පමණ අන්ධවීම් වලට ලක්වේ.එයට හේතුව වන්නේ අවසාන අවස්ථාවේදී රෝගීන් මෙම රෝගී තත්වය හදුනාගැනිමයි.අවාසනාවට කරුණ නම් ,බොහෝ රටවල ග්ලූකෝමා රෝගීන්ගෙන් 50% ක් තමන්ට ග්ලූකෝමා රෝගය යයි නොදැන ජීවත්වීමයි.

ග්ලූකෝමා රෝගය නිට්‍ටාවටම සුව කළ නොහැකිය.එහි රෝග පාලනයක් පමණක් කළහැකිය.මෙහිදී ප්‍රතිකාර වශයෙන් දියරමය ඖෂධ යෙදීම හෝ ශල්‍යකර්මයන් සිදුකරයි.බොහෝවිට සිදුවන්නේ මෙම දියරමය ඖෂධ ඇසට යෙදීමයි.

මෙලෙස දියරමය ඖෂධ ඇසට යෙදීම කිසියම් කාලසටහනකට අනුව සිදුකළ යුතුය .මෙය කාලසටහනේ ඇති වේලාවට පෙර හෝ පසුව ඖෂධ යෙදීම මගින් රෝගය කෙරෙහි සුවතාවයක් ඇතිනොවේ.

මෙම දියරමය ඖෂධ ලබාදෙන්නේ ඇසේ පීඩනය පාලනය කිරීම සදහා ය.එක් වරකදී එක් බිදුවක් බැගින් එක් ඇසකට යෙදිය යුතුය .වැඩිපුර යෙදීම මගින් ඖෂධ අපතේ යැවීමක් පමණක් සිදුකරයි.

ඇසේ පීඩනය ඉහළ යන්නේ පෙරවරු 8-9 හා පස්වරු 8-9 යන කාලසීමා වලදීය.එමනිසා ඇසට ඖෂධය යෙදිය යුත්තේද,අනිවාර්යයෙන්ම මෙම කාලසීමාවේදීය.

මෙම කාලසීමා වලට ප්‍රථමයෙන් ඖෂධය ඇසට යෙදීම මගින් හා මෙම කාලසීමා පසුවූ විට ඇසට ඖෂධය යෙදීම මගින් රෝගය පාලනය වීමක් සිදුනොවේ.එහිදී වන්නේ ඖෂධ භාවිතා කරන විටදීත් රෝගය උත්සන්න වීමයි.

ග්ලූකෝමා රෝගීන් විසින් සාමාන්‍යයෙන් එක් වරකදී ජලය වැඩි ප්‍රමාණයක් පානය නොකල යුතුය .දුම්බීම හා මධ්‍යසාර පානයෙන් ඉවත්විය යුතුය ,කිසියම් වෙනත් රෝගයක් සදහා ප්‍රතිකාර ලබාගැනීමකදී එම වෛද්‍යවරයාට තම රෝගය පිළිබඳව දැනුවත් කළ යුතුය .(ස්ටෙරොයිඩ ඖෂධ වෛද්‍යවරයා විසින් නිර්දේශ කිරිම වලක්වාගැනීමට)

දැනට ඔබට මෙම ග්ලූකෝමා රෝගී තත්වය නොමැති වුවත් ඔබ වයස අවුරුදු 40 ඉක්මවූ හෝ ඔබ පවුලේ ආසන්න කෙනෙකු හට මෙම ග්ලූකෝමා රෝගය පවතීනම් ,අවම වශයෙන් වසරකට එක් වතාවක් හෝ අක්ෂි වෛද්‍යවරෙක් වෙතට යොමු වී ඇස් පරීක්ෂා කරගන්න.මේ සදහා සියළුම රජයේ රෝහල් වල නොමිලේ පරීක්ෂණ හා වෛද්‍ය පහසුකම් ඔබ වෙනුවෙන් සපයා ඇත.අදම ලගම පිහිටි රජයේ රෝහල වෙතට යොමුවන්න.

විවිධ කාලවලදී ක්ෂණිකව මතුවන අක්ෂි රෝගයක් වන්නේ අක්ෂි ප්‍රදාහයයි (Conjunctivities) .මෙය සාමාන්‍ය ව්‍යවහාරයේදී "ඇස් ලෙඩ" ලෙසට හදුන්වයි.

මෙම ලිපිය කියවන බොහෝ දෙනෙකු අනිවාර්යයෙන්ම මෙම රෝගය සෑදී ඇති අයවළුන් විය යුතුය .

අක්ෂි රෝග ආකාර දෙකකට බෙදිය හැක.

• බෝ නොවන අක්ෂි රෝග

• බෝ වන අක්ෂි රෝග

පසුගිය ලිපි මගින් අපි සාකච්ඡා කරනු ලැබූ සියළුම අක්ෂි රෝග බෝනොවන අක්ෂි රෝග වේ.
(ඇසේ සුද,වපරය,ග්ලූකෝමාව,හතලිස් ඇදිරිය..............මෙම සියළුම රෝග පිළිබඳව මුල් ලිපි මගින් කරුණු දක්වා ඇත.)

බෝවන අක්ෂි රෝග කෙනෙකුගෙන් තවත් කෙනෙකුට රෝගය ව්‍යාප්ත වේ.මෙසේ ව්‍යාප්තිය සදහා බොහෝ විට හේතු වන්නේ ස්පර්ශයයි.සාමාන්‍යයෙන් මෙවැනි බෝවන අක්ෂි රෝගයක් සති දෙකක පමණ කාලයක් පවතී.මේවා මගින් ඇසේ ක්‍රියාකාරීත්වයට බාධාවක් ඇතිනොකරයි.නමුත් ,පෙර කියූ බෝ නොවන අක්ෂි රෝග මගින් ඇසේ පෙනීම ආදී ක්‍රියාකාරීත්වයට බාධාවන් ඇතිකරයි.වෛරස,බැක්ටීරියා,දිලීර ආදියෙන් මෙම බෝ නොවන අක්ෂි රෝග ඇතිවේ.

ඇස් රතු වීම,ඇස් වලින් කබ ගැලීම,ඇස් දැවිල්ල,ඇස් වලින් කදුළු ගැලීම,ඇස් පිහාටු ඉදිමීම,ඇස කෙවීම,ඇස තුල වැලි ඇට පවතිනවා සේ දැනීම සහ උගුරේ අමාරුව සමග තරමක උණ ගතියක් ඇති වීම මෙම බෝ වන අක්ෂි රෝග වල රෝග ලක්ෂණ වේ.සාමාන්‍යයෙන් මෙවන් ලක්ෂණ පැය 24 කට වඩා පවතීනම් මෙය අනිවාර්යයෙන්ම අක්ෂි රෝගයක් යැයි නිර්දේශ කල හැකිය.

සාමාන්‍යයෙන් බහුල වශයෙන් පවතින බෝ නොවන අක්ෂි රෝගය වන්නේ "අක්ෂි ප්‍රදාහය" (Conjunctivities) හෙවත් "ඇස් ලෙඩ" යි.


ඊලඟ ලිපියෙන් නැවත හමුවෙමු...........

D.H.S.L ( "Dinapotha" )

❆❆❆❆❆❆❆❆❆❆❆❆❆

Facebook ඔස්සේ නවතම ලිපි පරිශීලනය කිරීම සදහා " දිනපොත - Dairy " පිටුව සමග මෙතනින් එකතු වන්න.

මෙම ලිපිය හා සමස්ථ ලිපි පෙළ මගින් ඔබගේ දැනුමට හා සෞඛ්‍ය සදහා ලැබුනු දායකත්වය පහත අංක අනුව ප්‍රතිචාරයක් ( Comment ) ලෙසට දක්වන්න.


100%   නම්   ⇨(1) 😀                75%  නම්  ⇨  (2)  😁50%    නම්  ⇨ (3)  😐                 25% නම්    ⇨(4) 😳

අටවැනි දිගහැරුම (#8)

වපරය සහ ග්ලූකෝමා රෝගය  ❆❆❆❆❆❆❆ 

අක්ෂි ආබාධයක් වූ වපරය ඇතිවීමට බලපාන හේතු වල මුල් කරුණු හත්වෙනි ලිපියේ (#7) ඇති අතර එහි ඉතිරි වූ කරුණු මුලින්ම සාකච්ඡා කරමු.

අවශ්‍ය නම් හත්වෙනි ලිපිය(#7) මෙතනින් බලන්න .
• මොළයේ අක්ෂි චාලක ස්නායු මගින් ඇසේ චලනය පාලනය කරන ප්‍රදේශයේ කිසියම් රෝගී තත්වයක් නිසා අකර්මණ්‍ය වීම.

සමහර අවස්ථා වලදී මොළයේ පිළිකා තත්වයන් මෙයට හේතු විය හැක .

• ඇසෙහි චලනයන් පවත්වා ගැනීම සදහා මොළය මගින් ඇස වෙතට ස්නායු ආවේග ගෙනයනු ලබන අක්ෂි චාලක ස්නායු අකර්මණ්‍ය වීම.

මේ සදහා එක් අක්ෂි චාලක ස්නායුවක් හෝ අකර්මණ්‍ය වීම ප්‍රමාණවත් වේ .එහිදී ඇස පුද්ගලයාට අවශ්‍ය පරිදි චලනයන් සිදුනොවේ.

• කුඩා දරුවන්ගේ ඉපදීම සමගම ඇසේ සුද ඇතිවීම.

කුඩා දරුවන්ගේ ඇසේ සුද ඇතිවීම සමග ඇස මගින් පෙනීම ලැබීමේ ක්‍රියාවලිය අඩාල වීම නිසා ඇස අලස වේ .දරුවා ඉපිද ආසන්නතම දිනක මෙම ඇසේ සුද ඉවත් කිරීමක් කළහොත් මෙම වපර තත්වයන් ඇතිවීමෙන් දරුවා මුදාගත හැකිය.

• ඇසට සිදුවන හදිසි අනතුරු

ඇසට සිදුවන අනතුරු නිසා අක්ෂි චාලක ස්නායු වලට හෝ දෘෂ්ටික ස්නායුවට හානිවීමේදී මෙවැනි තත්වයන් ඇතිවේ .

• අධික තෙහෙට්ටුව හා අධික නිදිමත නිසා ඇසට වෙහෙසට පත්වීම.

අධික වෙහෙස නිසා අක්ෂි පේශි විඩාවට පත්වේ .එමනිසා ,ඇස නිසියාකාරයෙන් චලනය සිදුනොවීම නිසා වපරමය තත්වයන් ඇතිවේ.

• ඇස කුඩා කර ඇසට වෙහෙසක් වන ආකාරයට හා ඕනෑකමක් නොමැතිව යමක් දෙස බැලීම සහ ඇස ඇදකර බැලීම.

ව්ශේෂයෙන් වියපත් පුද්ගලයින්ට ලග නොපෙනීම,දුර නොපෙනිම,ඇසේ සුද මතුවීම වැනි තත්වයන් වලදී උපැස් යුවල භාවිතා නොකිරිම සහ අවශ්‍ය ශල්‍යකර්මයන් සිදු නොකිරීම නිසා ඇස කුඩා කර අධික වේලාවක් බලාසිටීමේදී අක්ෂි පේශි ස්වාභාවික ස්වරූපයෙන් වෙනස් වීම් වලට භාජනය වීම නිසා ඇස තමන්ට අවශ්‍ය ලෙසට චලනය කිරීමට නොහැකි වේ.

• දියවැඩියාව බොහෝ කාලයක් අධික ලෙසට පැවතිම නිසා ඇසේ සියුම් රුධිර නාල තුල පීඩනය වැඩිවී ඒවා පුපුරා යෑම නිසා .

බොහෝ අවස්ථා වලදී ඇසේ වපර තත්වයන් සදහා ප්‍රතිකාර ක්‍රම පවතී.එවැනි ප්‍රතිකාර ක්‍රම පිළිබඳව සලකා බලමු .

• ඉපදීමත් සමග කුඩා දරුවන්ගේ ඇතිවන ඇසේ සුද තත්වයන් සදහා ඉක්මනින්ම ශල්‍යකර්මයන් මගින් ප්‍රතිකාර කිරීම නිසා දරුවා වැඩිහිටි වන විට ඇතිවන ඇසේ වපර තත්වයන්ගෙන් මුදාගැනීමට හැකිවීම.

• උපැස් යුවල පැලදවීම.

අවිදුර ,විදුර , හතලිස් ඇදිරිය හා සමහර ඇසේ සුද ඇතිවිම් නිසා ඇති වන වපර තත්වයන් සදහා මෙය සුදුසු වේ.

• දියවැඩියාව ,අධිරුධිරපීඩනය වැනි රෝග නිසි ඖෂධ ලබාගැනීම හා වෛද්‍ය උපදෙස් අනුගමනය කරමින් රෝග පාලනයක් ඇතිකරගැනීම.

• එක් ඇසක් අලස වීම නිසා ඇතිවන වපර තත්වයන් සදහා සම්පූර්ණ ක්‍රියාකාරී ඇස කිසියම් කාළ සටහනකට අනුව වසාතැබීම.

• අධික ලෙසට දීර්ඝ කාලයක් නිදි මැරීමෙන් වැලකීම.

• අවසාන වශයෙන් අක්ෂි පේශි වල ගැටළුවක් නම් ශල්‍යකර්මයකට භාජනය කිරීම.

මෙහිදී ඇසේ වපරය නැතිකොට එම ඇසේ නිවැරදි ඉලක්කය ගැනීම සදහා ශල්‍යකර්ම කීපයක් වුවත් කිරීමට සිදුවේ.

✥✥✥✥✥✥✥✥✥✥✥✥

ග්ලූකෝමාව යනු තවත් එක්තරා අක්ෂි ගැටළුවක් වේ."ඇස් අන්ධ කරන නිහඬ මාරයා" ලෙසට මෙම ග්ලූකෝමා රෝගය හදුන්වයි.එතරම් බිහිසුනුභාවයක් මෙම රෝගය සතුව පවතී .

බටහිර වෛද්‍ය විද්‍යාවේදී "ග්ලූකෝමාව" ලෙසට හදුන්වන මෙම රෝගය ආයුර්වේද වෛද්‍ය විද්‍යාවේදී "නීලකාච" රෝගය ලෙසට හදුන්වයි.

ග්ලූකෝමාව යනු,නිට්ටාවටම සුව කල නොහැකි රෝගයක් වේ.එම රෝගය කිසියම් පාලනය කිරීමක් පමණක් කලහැකිය.ඒ සදහා වෛද්‍ය නිර්දේශය මත ලබාදෙන්නාවූ ඇසට දමන ඖෂධ නියමිත මාත්‍රවෙන් ,නියමිත වේලාවට ඇසට දැමිය යුතුය .රෝගයේ මූලික අවස්ථාවේදීම එය හදුනාගැනීම මත අන්ධභාවයට පත්වීම වලක්වාගත හැකි අතර එහිදී ද නිට්ටාවට සුවකිරීමක් සිදුකල නොහැකිය.

ග්ලූකෝමා රෝගයට හේතුවන්නේ,ඇසේ පවතින දෘෂ්ටික ස්නායුවට හානිවීමයි.ඇසේ පවතින අධික පීඩනය නිසා මෙලෙස දෘෂ්ටික ස්නායුව හානිවීම සිදුවේ.මෙහිදී ඇසේ පීඩනය යනු,රුධිර පීඩනය නොවේ.

ඇසේ පවතින දෙවන ස්ථරය හෙවත් රුධිර ග්‍රාහය මගින් අනෙකුත් ස්ථර වලට හා සමස්ත ඇසට අවශ්‍ය ශ්වසන වායු,පෝෂක ආදිය ලබාදීම සිදුවේ.මෙවැනි ද්‍රව්‍ය ලබාදීම සිදුවන්නේ,රුධිර ග්‍රාහය මගින් ඝ්‍රාවය කරන තරලයක් මගිනි.කිසියම් හෝ හේතූන් මත මෙම තරලය රුධිර ග්‍රාහය මගින් වැඩියෙන් ඝ්‍රාවය වීම හෝ ඝ්‍රාවය වන තරලය රුධිර ග්‍රාහයෙන් ඉවත් වීම ප්‍රමාද වේ.මෙම ප්‍රමාදය නිසා සමහර අවස්ථා වලිදී මෙම තරලය ඇසේ කාච රසය තුළටද කාන්දුවීමක් සිදුවේ .එහිදී කාච රසයේ දුස්ස්‍රාවීතාවය වෙනස් වීමක්ද සිදුවේ.

පහත රූප සටහනේ පලමු කොටස මගින් නීරෝගී ඇසක් නිරූපණය වන අතර ,දෙවන කොටස මගින් දක්වනු ලබන්නේ ඇසේ රුධිර ග්‍රාහය මගින් ඇති කරනු ලබන පීඩනය ඇසේ දෘෂ්ටිවිතානය මත ඇතිකරනු ලබන ආකාරයයි.

මේ හේතූන් නිසා රුධිර ග්‍රාහය තුළ පීඩනය ඉහල යයි.මේ පීඩනය නිසා තවත් ඇතුළු දෙසට රුධිර ග්‍රාහය තෙරපීමට ලක්වේ.එමනිසා ,ඇසේ තුන්වන ස්ථරය වූ දෘෂ්ටික ස්නායුක ස්ථරයද තෙරපීමකට ලක්වේ.එහිදී ,එම ස්ථරයේ පවතින දෘෂ්ටික සංවේදක සෛලයන් වන කේතු සෛල සහ යෂ්ටි සෛල ද තෙරපීමකට ලක්වීම නිසා ඒවා ක්‍රමක්‍රමයෙන් විනාශ වී යයි.ඊට අමතරව එම ස්ථරයේ පවතින ද්වීධ්‍රැව නියුරෝන සෛලයන්ද මෙසේ තෙරපීම නිසා ක්‍රමක්‍රමයෙන් විනාශ වී යයි.

මෙසේ වීම නිසා දෘෂ්ටිවිතානය මත ප්‍රතිබිම්බය ඇති වුවත් ,එය දෘෂ්ටික ස්නායුව ඔස්සේ මොළයේ අදාල ප්‍රදේශය මතට ගෙනයාම අවහිර වේ.එමෙන්ම කාච රසයේ දුස්ස්‍රාවීතාවය වෙනස් වීම නිසා වස්තුවෙන් පැමිණෙන ආලෝකයේ නිසි වර්තනයක් ඇතිනොවේ.

ග්ලූකෝමා රෝගයේදී දිනකට මෙම ස්නායු 40000 ක් පමණ විනාශවීමක් සිදුවේ .එමනිසා,රෝගයේ මූලික රෝග ලක්ෂණ ඇතිවූ වහාම වෛද්‍ය ප්‍රතිකාර ලබාගැනීම උචිත අතර රෝගය නොසලකා හැරීම තුළින් ක්‍රමක්‍රමයෙන් ඇසේ පෙනීම නොපෙනී ගොස් අවසානයේදී අන්ධභාවයට පත්වේ.අන්ධභාවයට පත්වූ පසුව නැවතත් මියගිය දෘෂ්ටික නියුරෝන සෛල මූලික තත්වයට ගත නොහැක .

මෙම ග්ලූකෝමා රෝගය අවස්ථා දෙකක් ලෙසට පවතී .

1. Open angle

2. Closed angle

මෙම අවස්ථා දෙකට අදාලව රෝගී ලක්ෂණ වෙනස් වේ.බොහෝ දුරට රෝගීන් වාර්ථා වන්නේ Open angle රෝගී තත්වයෙන්‍ ය.

Open angle වර්ගයේ ග්ලූකෝමා රෝගයේ රෝගී ලක්ෂණ සලකමු .

සාමාන්‍යයෙන් මෙම Open angle හෝ Closed angle යන ග්ලූකෝමා රෝගී තත්වයන් සාමාන්‍යයෙන් මතුවෙන්නේ වයස අවුරුදු 40 ඉක්මවූ පසුව වේ.එමනිසා අවමය ලෙසට අවුරුද්දකට වතාවක් හෝ අක්ෂි පරීක්ෂාවක් කරගැනීම සුදුසු වේ.Open angle අවස්ථාවේදී මූලික රෝගී ලක්ෂණ රෝගියාට අවම ලෙසට දැනීමක් සිදුවීම එහි ඇති භයානකම  තත්වයයි.

ඉහත රූප සටහනේ පලමු කොටස මගින් නීරෝගී ඇසක් මගින් කිසියම් දර්ශණයක් පෙනෙන ආකාරය පෙන්නුම් කරන අතර ,දෙවන කොටස මගින් ග්ලූකෝමා රෝගය සෑදුණු හා තවමත් අන්ධ නොවූ ඇසකට කිසියම් දර්ශණයක් පෙනෙන ආකාරය පෙන්නුම් කරයි.එම අවස්ථා දෙකේ වෙනස්කම් හොදින් හදුනාගන්න.ඔබටත් දැනටම ග්ලූකෝමා රෝගය සෑදී ඇත්දැයි මේ ආකාරයට නිගමනය කළ හැකිය .

එහිදී රෝගය ආරම්භයේ සිටම රෝගියා දකින වස්තූන්ගේ දර්ශණ වල දෙපසින් අදුරු වීමක් හෝ නොපෙනීමක් හෝ පවතී.මුල් අවස්ථාවේදී මෙය සුළුවෙන් ආරම්භ වී ක්‍රමක්‍රමයෙන් මෙසේ ඇස දෙපසින් නොපෙනීම හෝ අදුරු වීම වැඩි වීමක් සිදුවේ .එමනිසා රෝගය උත්සන්න වී අන්ධ වීමට ආසන්න වන තෙක්ම රෝගියා බොහෝදුරට මේ පිළිබඳව උනන්දු නොවේ.

මේ නොදැනුවත්කම නිසා ශ්‍රී ලංකාවේ ග්ලූකෝමා රෝගීන්ගෙන් 12% ක් අන්ධභාවයට පත්වේ .එයට හේතුව වන්නේ ,ඔවුන් තමන් ග්ලූකෝමා රෝගීන් යයි හදුනා ගන්නේ අවසාන මොහොතේදී නිසාය.

Closed angle ග්ලූකෝමා තත්වය සාමාන්‍යයෙන් අවම පුද්ගලයින් ප්‍රමාණයකට සෑදේ.Open angle ග්ලූකෝමා තත්වයට සාපේක්ෂව මෙහිදී රෝගියාට රෝග ලක්ෂණ හදුනාගත හැකි ආකාරයට පෙන්නුම් කරයි.එමනිසා,අන්ධභාවයට පත්වීමට පෙර පහසුවෙන් හදුනාගත හැකිය .

මෙම Closed angle තත්වය ක්ෂණිකව සෑදෙන රෝගී තත්වයක් වේ.එය Open angle රෝගී තත්වය මෙන් දීර්ඝ කාලීන ග්ලූකෝමා තත්වයක් නොවේ.Close angle ග්ලූකෝමා තත්වයේදී ආරම්භයේ සිටම රෝගී ලක්ෂණ හොදින් රෝගියාට දැනීම සිදුවේ.

ඊලඟ ලිපියෙන් නැවත හමුවෙමු................

D.H.S.L

ලිපියේ පහළින් ඇති මෙම ලිපියේ ගුණාත්මකභාවය ප්‍රතිශතයක් (%) වශයෙන් සටහන් කළ හැකි තීරුවේ ඔබේ මනාපය පළකිරීමට කාරුණික වන්න.

Facebook ඔස්සේ " දිනපොත - Dairy " පිටුව සමග ඔබට මෙතනින් එකතුවිය හැකිය.

❋❋❋❋❋❋❋❋❋❋❋❋❋❋